10 qyrküiek — bükılälemdık suisidtıŋ aldyn alu künı. Düniejüzılık densaulyq saqtau ūiymynyŋ mälımetınşe, älemde är 40 sekund saiyn bır adam öz-özıne qol jūmsaidy. Iаǧni, jyl saiyn 800 myŋ adam suisidten qaitys bolady.
Öz-özıne qol salu – älemdık qūbylys
«Kez kelgen ölım - qaiǧyly oqiǧa. Dese de,suisidtıŋ aldyn aluǧa bolady. Bız barlyq elderdı bıryŋǧai baǧdarlama qabyldauǧa şaqyramyz. Ony densaulyq saqtau jäne bılım beru salalaryna qosu kerek»,-deidı DDŪ bas direktory Tedros Adhanom Gebresiesus.
Bügınde DDŪ-ǧa müşe 183 eldıŋ 38-ınde ǧana suisidtı aldyn alu üşın qabyldanǧan baǧdarlama bar.
2019 jyly elımızde künıne on adam özın ajalǧa qiǧan
Qazaqstan Ortalyq Aziia elderınıŋ arasynda suisid boiynşa üşınşı oryndy alady. QR Bas prokuraturasy qūqyqtyq statistika jäne arnaiy esepke alu jönındegı komitetınıŋ mälımetı boiynşa, ötken jyly elımızde 3805 adam öz-özıne qol salǧan, onyŋ 180-ı — kämeletke tolmaǧandar. Demek, künıne 10 adam özın ajalǧa qiǧan. Suisid Almaty, Şyǧys Qazaqstan jäne Türkıstan oblystarynda köp tırkelgen.
Adam eşkımge qajetsız ekenın sezıngen jaǧdaida özıne qol jūmsaidy
«Jasöspırımder arasynda suisid faktılerı jiı tırkeledı. Sebebı, qazırgı taŋda ata-analar balalarynyŋ tärbiesıne dūrys köŋıl bölmeidı. Barlyǧy jūmysbasty bolyp ketken. Negızınen, özın-özı öltıru – psihikalyq aurudyŋ nätijesı. Adam eşkımge qajetsız ekenın sezıngen jaǧdaida özıne qol jūmsaidy. Qūrmettı ata-analar, balalaryŋyzben syrlasyŋyzdar, olardy qoldap, meiırım körsetıŋızder»,- deidı psiholog Malika Qanatqyzy.
Jaqynymyzǧa janaşyr bolyp, onyŋ jan aiqaiyn estuge tyrysaiyq, oqyrman!
Diana ASAN,
«Adyrna» ūlttyq portaly
