Asqarbek Jaqsylyq Serikbekuly- 1999 jyly sáýir aıynyń 9-shy juldyzynda ShQO,Tarbaǵataı aýdany,Aqsýat aýylynda dúnıege kelgen.Semeı qalasyndaǵy Shákárim atyndaǵy ýnıversıtet túlegi.Respýblıkalyq Abaı Qunanbaev atyndaǵy stıpendııa ıegeri.Jyr músháıralarynyń jeńimpazy.
Ne dep óleń jazaıyn kúnim,saǵan?
Baqyt izdep túńiler,túńilse adam...
Baqytsyzdar kóp shyǵar,men-aq osy,
Ólsem ólip keteıin búgin sodan!
Sen ketkesin,qulazyp,kúırep kóńil,
Sulý qyzǵa kórmedim súı dep nebir!
Úılenbedim men saǵan,esesine,
Esesine súıýdi úıretti ómir!
Shyrynyńnan tatqansha shirkin,seniń,
Tátti uıqynyń buzdy ǵoı shyrqyn seriń!
Qaıta aınalyp qushpaıdy,kýágermin,
Qarsy aldyńda bir ret irkilse kim?!
Men qadirin bilmeppin eshteńeniń,
Sen eshqashan kinámdi keshpe meniń!
Qanshama ret júrekti keýdeńdegi,
Qan jylatqan qalmasyn este óleńim!
Bastap ketip búldirdim bir isti ońdy,
Sert,senimim
talpyndy,
tyrysty,
óldi!
Men súıýden QATELIK jibergenmen,
Sen eshqashan súımediń,DURYS boldy!
******
Shattanyp kúlip,shalqymaı daǵy,
Súıýdiń mynaý,salty qaıdaǵy!?
Sáýlemdi meniń sýytyp aldy-aý,
Sanamnyń sansyz salqyn oılary!
Elestep óńiń ózińniń beıne,
Jazamyn óleń kózimdi ilmeı de.
Azabyn tartam aqyretińniń,
Ǵajaby úshin sezimniń keıde..
Kórkińe kerim kelisken músin,
Kóp sulýdaǵy sen ústembisiń?!
Qalyqtap júrgen qııalymdaǵy
Perızatym-aý,perishtem,qusym!
Kúlkimdi meniń ysyrar qaıǵym,
Seni de qoldan ushyrardaımyn.
Óńmenen tústiń bárin de bilip
Ózimdi ǵana túsine almaımyn!
"Senemin!
Kezdesýge sen kelesiń,
Bilmeımin,kúdik basym mende nesin?!
Óńimde kórem seni,túsimde emes,
Elesteıtin bolmaıdy endi elesiń!
Meni osy jalyqtyrǵan ańsar muńnan
aryltasyń,
Shyǵasyń qarsy aldymnan!
Jańǵyryp jatyr mine bultty aspan,
Men edim sen keldi dep jar saldyrǵan!
Shahardyń shamy sónip kóshelerden...
Kólikter óte bersin neshe kerýen!
Ýaqyt óte bersin,kúte berem,
Sáýlesi úmitimniń óshe kórmen!
Tıse de taǵdyrymnyń taıaǵy udaı,
Kútemin taǵy taǵy...aıa,Qudaı!
Men endi ǵashyq adam emespin be,
Jasyq adam emespin baıaǵydaı!"
Dep turyp óz ishimnen,masaıradym,
Kóp turyp kúttim seni
Qosh,aımanym!
Kelmediń!
Kezdestim de osy oılarmen,
Shyǵaryp saldy meni osy oılarym!
《Tús》
Men syrlas bolǵanmyn ózińmen,
Sezimniń bolsa da semgeni.
Belgisiz bir túnde kóz ilgen,
Túsińde kóripsiń sen meni..
Júzik te taǵyppyz jaqutty,
Úılenip bir úıdiń ishinde.
Óńimde bolmaǵan baqytty,
Syıladyń sen maǵan túsińde!
Osy úshin sezimmen mendegi,
Ózińe gúl alyp kelem be?
Jalǵyz-aq qolymnan kelgeni-
Jorytyp otyrmyn óleńge..
Tyrysyp baqsam da baıqadym,
Bilemin paıda joq isimnen!
Áıtse de alǵysymdy aıtamyn,
Túsińde kórgeniń úshin men!
Ózińe aqynyń jetse edi?
Óńinde ony oılaý muń eken!
Osynaý túsińnen tek seni,
Oıatyp jibergen kim eken?!
*****
"Ekeýmizde aıtylmaǵan ne qaldy?!"
Syńǵyr kúlkiń-bulaq aıtqan syr bolyp,
Syldyr sózdiń shamaly ettim keregin.
Seniń móldir kózderińnen jyr bolyp,
Jer betine jylap aqsam dep edim!
Qaıter ekem,qalam ustar qoldardy?
Bir qudyret kórmediń de bir menen!
Saǵan meni bastamaıtyn joldardy,
Júregińe jalǵasam ba,jyrmenen?
Aıqaı salyp Alataýdan assam da,
Bıiktigin qaıtem mynaý eńseniń!?
Jer jahandy jalpaǵynan bassam da,
Júregińe syımaımyn-aý,men seniń?!
Qansha muńnan óleń bolyp qaıtty ese,
Ómir bizge úırenshikti bop aldy!
Sen aıtpadyń súıemin dep,áıtpese,
Ekeýmizde aıtylmaǵan ne qaldy?
*****
...Tamsanǵan kózdi taldyryp,
Kóńildi bılep tətti ənmen.
Alqyzyl gúldi tań qylyp,
Kelesiń Kúzgi baqtarmen.
Úrligin kópke úlgi etken,
Qaıyńnyń jetpeı qoly da.
Japyraqtaryn qurmetpen,
Jaıǵandaı seniń jolyńa!
Tylsymyn taǵy buzdyń ba?
Jylǵadan bulaq kep kórip.
Býyny bosap muzdyń da,
Jylaǵan jandaı ketti erip.
Kórdi me seni kókten keń,
Shaǵala-qazdar qaıtpaı júr.
Dəmeli mendeı kóktemnen,
Qanatty tilsiz aıtpaı júr.
Alǵandaı tartyp seni men,
Baqytsyz kúndi tek kórem.
Janym-aý,sodan beri men,
Janaryn kúzdiń jek kórem!
*****
Syılamaı shattyq dostar da,
Eńseni talaı túsirgen.
Toılarǵa baram,tosttarda
Jabyrqap,jylaý úshin men!
Kútermin túndi tańdarda,
Sen ǵana maǵan ómir me eń?
Barasyń basqa jandarǵa,
Kelmeıtin maǵan kóńilmen!
Sezim be,sezim-jalǵan sol,
Túsirsin taǵdyr ıleýge!
Sertimde turmaı qalǵan soń,
Sert berip júrmin súımeýge!
Aqtarǵan talaı syryńdy,
Aıybym bolsa óshirip,
Dápterińdegi jyrymdy,
Júregiń alsyn kóshirip!
Kóńildi solaı...
kúl!
aýla!
Ezýler endi jıylmaı.
Jolyǵar bolsaq,jylaýǵa
Tamshy da qalsyn buıyrmaı!
Surasa qurbyń baıqaǵan,
Óleń ǵoı óleń,oı,shabyt!
Atymdy meniń aıt oǵan-
Aqyn ǵoı,aqyn-deı salyp!
Esimnen talaı tandyrdyń,
Erkińmen emes...
qalǵany-
tek qana seni taǵdyrdyń,
Qolymnan tartyp alǵany!
Jaqsylyq Asqarbek
