Äiteuır, auyl äkımı bolyp şyǧa keldım. Sony dostarymmen äkımşılıkte juǧanym esımde. Tünnıŋ bır jarymynda jarqanat qūsap ūşyp kelemın. Aryq arnasynan tasyp ketken siiaqty, qyzuym qyryq gradustan asyp ketken siiaqty, jelıp kelemın. Jäi jelıp kele jatqan joqpyn, qiialym şaryqtap, «Äkımmın ǧoi, men äkımmın!» degen köŋılmen, sary maidai erıp kelemın!
Jazdyŋ künı bolǧandyqtan, bala–şaǧamyzben esık aldyndaǧy tapşanda qatar jatatynbyz. Kele salyp, şalbarymdy bır būtaqqa ıldım de, äielımnıŋ ūiyqtap jatqanyn bıldım de, qoinyna qoiyp kettım. Qūşaqtap jatyrmyn. Ol özın küieuı pyşaqtap jatqandai, terıs qarap jatqan künı aiaǧymen tebedı.. Şalqamnan tüs ıp, kök jüzıne qaradym. Anau jarqyryap tūrǧan menıŋ jūldyzym! Auyl äkımınıŋ jūldyzy! Qūdai qalasa, jol salamyn dep jeimın, auylǧa su, gaz tartamyn dep jeimın, söitıp astyma bır «Djip» satyp almasam ba?
Äielım menı ökpelep qaldy dep oilady ǧoi deimın, maǧan qarai aunap, belımnen qūşaqtady. Ekeumız qūşaqtasyp, bıraz jattyq. Belınen sipaladym. Ol menıŋ arqamdy qasydy. Mūnysyn tüsınbedım. Moinynan iıskedım, ol menıŋ mūrnymnyŋ ışıne sausaǧyn tyqqyştady. Mūnysyn da tüsınbedım. Äzıldep jatqany şyǧar? «Ei, qatyn, közıŋdı aşsaŋşy? Sen endı auyl äkımın qūşaqtap jatyrsyŋ! Auyl äkımıın!»–dep qoiamyn ışımnen. «Äkım boldym!» – dedım men qūlaǧyna sybyrlap. Ol: «Sen sümelek qaidan äkım boluşy edıŋ?» – dedı auzy–mūrny jybyrlap. Jynym şaşymnyŋ ūşar basyna şyqty. Şapalaqpen betıne salep jıberdım. Äielım oibailap atyp tūrdy. Bıreu jügırıp baryp, esık aldyndaǧy svettı jaqty. Mässaǧan! Äielım degenım– körşımnıŋ äielı! Svettı jaqqan küieuı! Myna jaqta jatqan bala–şaǧasy! Auzym aşylyp qalypty! Mastyǧym mysyq siiaqty miiaulap kettı. «Ei, körşı? Äielım ekeumızdıŋ ortamyzda neǧyp jatyrsyŋ?» dep sūraidy körşım kıjınıp. «Sender nege ekı jaǧyma jatyp alǧansyŋdar?» deimın men de qalyspai. Ol juan jūdyryǧymen tūmsyǧyma perıp qaldy! «Men äkımmın! Äkımdı ūrsaŋ, sottalasyŋ!» dep qoiamyn. Söitsem, mastyqpen baiqamai, körşınıŋ şarbaǧyna kırıp ketıppın ǧoi? Tüsıne qoidym da, «Keşırıŋder, adasyp ketıppın!» dep şalbarymdy ızdedım. Bır būtaqqa ıldım desem, küisep tūrǧan sityrdyŋ müiızıne ıle salyppyn. Siyr tūra qaşty. Şalbarsyz qalai kırem endı? Äielım basqaşa oilap qalady ǧoi? Ekı üi ary jügırıp baryp, Barlybaidyŋ aulasyna ūrlanyp kırdım. Jaiuly tūrǧan kiımderdıŋ arasynan Barlybaidyŋ şalbaryn ızdep tauyp aldym. Kiınıp, üige kelsem, esık aldy topyrlaǧan adam. Svet jarqyrap tūr. Äielım, bala–şaǧam oianyp ketıptı. Körşım menı körıp tūra ūmtyldy. Barlybaidyŋ şalbary eken dep, özbek äielınıŋ tızeden tömen tüsetın dambalyn kiıp alǧanymdy polisiia uchaskesınde bıraq bıldım. Ne kerek, körşım audanǧa aryz jazyp, bır kün äkım bolyp otyrmastan, qyzmetımnen bosadym! Solai, dostar,äkım bolǧanymdy qaiteiın, qyzyǧyn körıp ülgemedım ǧoi!
Mūhtar Şerımnıŋ qyşqyl satirasy,
«Adyrna» ūlttyq portaly
