Karantın áıelderdi ádemilikten, salondardy tabysynan alystatýda

4601
Adyrna.kz Telegram

Pandemııa kezinde elimizdegi túrli kásip ıeleri qarjylaı daǵdarysqa tap boldy. Shyǵyn kólemi kún sanap artýda. Solardyń qatarynda shashtarazdar men sulýlyq salondary bar.

Karantınniń saldarynan kásipkerliktiń túr-túri zardap shegip, kóbisi amalsyz qyzmetin toqtatýǵa májbúr bolýda. Elimizdegi sán salondary men shashtarazdar 21 naýryzda jabylyp, 18 mamyrda ǵana ashylǵany málim. Osy ýaqyt aralyǵynda tabyssyz qalǵan osy kásiptiń ıeleri mamyrdyń ortasynda jumysyna kiriskeni sol edi, kóp uzamaı, 5 shildede qaıta jabyldy. Sanıtarlyq talaptardyń qatań bolǵany sondaı, kóp shashtaraz bul talapqa saı kelmeı, tipti múlde jabylyp ta tyndy.

17 tamyzda jumysyna qaıta kiriskenimen, elimizdegi shashtaraz, sán salondary senbi, jeksenbi kúnderi esikterine qara qulyp salýǵa májbúr. Talap sondaı. Soǵan qaramastan, ólmestiń kúnin keship, úkimetke alaqan jaımaý maqsatynda qolda bar kásibin dóńgeletýge bar kúshin salyp jatqan kásipkerler joq emes. Shymkenttik  birqatar sán salony men shashtaraz oryndaryn aralap shyǵyp, tómendegideı jaıtqa kóz jetkizdik.

Óziniń jeke sulýlyq salonyn sońǵy on jylda aıaǵyna tik turǵyzyp, paıdasyn kórip kelgen Aınur QURALBEKQYZY karantınde  kásibiniń toqyrap qalǵanyn aıtady. «Eshkimge ońaı tımedi bul pandemııa. Desek te, salonymda buǵan deıin qyzmet etken sheberlerimniń birazyn joǵalttym. Kúnkóris qamymen basqa saladan nanyn tabýǵa ketti. Osyǵan deıingi turaqty klıentterimniń de sany eki esege kúrt tómendedi. Karantın kezinde klıenttiń shaqyrtýymen úıine baryp manıkıýr, pedıkıýr syndy qyzmetter kórsetken sheberlerim bar. Alaıda paıda túsimi óte tómen boldy.

Erteńgi kúnimiz qalaı bolyp keter eken dep alańdaǵan jurt tyrnaǵyn árleýdi oılamaıtyny zańdylyq ta shyǵar. Qazir aptanyń bes kúninde keshki saǵat altyǵa deıin jumys istep jatyrmyz. Ókinishke qaraı, kelýshiler óte az. Kóbisi sulýlyq máselesimen demalys kúnderi aınalysqysy keledi. Alaıda demalys kúnderi bizge jumys isteýge tyıym salynǵan. Sonymen qatar salonymyz toıdyń kezinde jandanyp jumys isteıtin. Al qazir toı da joq. Sondyqtan bolsa kerek, kiristen góri, shyǵynymyz basym túsýde. Salonnyń bólmesin, ústelderin jalǵa alamyz, kerekti jabdyqtardy satyp alamyz. Al bizdiń qyzmetke júginetinder sany óte tómen bolǵandyqtan, bul shyǵyndardyń ornyn toltyrý óte qıynǵa soǵýda», - deıdi Aınur.

Tyrnaq jasaýdyń sheberi Aıaýlym SÁBITOVA: «Karantın kezinde turaqty jumysymyzdan aıyrylyp qaldyq. Alaıda «ár nárseniń qaıyry bar» demekshi, klıentterdiń shaqyrtýymen úıine baryp qyzmet kórsetýdiń arqasynda jaǵdaıymyzdy birshama túzetip aldyq. Máselen, men qazir eshbir salonda jumys istemeımin. Arnaıy tapsyryspen jumys isteımin. Biraq rasymen burynǵydaı suranys joǵary emes. buryn aptanyń barlyq kúninde shaqyrtý bolatyn. Al qazir eki kúnde bir shaqyrtý alamyn. Bálkim, burynǵydaı toı, banket joǵynan bolar. Bálkim, kóbisi qashyqtan jumys istegendikten bolar. Áıteýir qyz kelinshekter qazir «ádemi bolýǵa» asa qulshyna qoımaıtyn boldy», -dep kúldi.

Osyǵan deıin bir aıda birneshe ret sán salonyna barýdy ádetke aınaldyrǵan qyz kelinshekterimiz rasymen «ádemi bolýdan bas tartty ma» , álde basqalaı sebepteri bar ma eken?

«Karantınge deıin birinshi aptada shashymdy, ekinshi aptada kirpigimdi jasatýǵa baratynmyn. Aıdyń úshinshi aptasy tyrnaqtaryma arnalsa, sońǵy aptada massaj ben basqa da bet kútimderi úshin sán salonyna baratynmyn. Bıylǵy naýryzdan keıin ómirimiz kúrt ózgerdi ǵoı. Bir jaqqa shyǵýdyń ózi muńǵa aınaldy. Alǵashqy kezde árıne, jasatqan tyrnaqtarym ketilip, qoldarym usqynsyz bolyp, qatty kóńil kúıim túsken edi. Mamyr aıynda ósip ketken shashtarym men túsip qalǵan kirpikterime kózim úırene bastady.

Keıinirek úıge sán salonynan adam shaqyrtyp ketilgen tyrnaqtarymdy durystatyp alatyn boldym. Ókinishke qaraı, sondaı proedýranyń birinde tyrnaǵyma ınfekııa túsip, qatty zardap shektim. Sol jaǵdaıdan keıin úıge sán salony qyzmetkerin shaqyrtýdy toqtattym. Qazir qashyqtan jumys istegen soń, sulýlyqqa asa mán bermeıtin bolyp aldyq. Sán salonyna eki aıda bir ret baramyn. Onda da shashymdy qysqartyp, kirpik jalǵatý úshin»,- deıdi sán salondarynyń turaqty klıentteriniń biri Maıra TURSYNBAI.

QR sulýlyq ındýstrııasy assoıaııasynyń prezıdenti Mahmýdjan Týrsýn sán salondary naryǵynyń 20 paıyzǵa azaıǵanyn aıtady dep jazady Caravan.kz  saıty. «Bulaı azaıýdyń sebebi, karantın sharalary men sanıtarlyq talaptar úshin bólinetin shyǵyn kólemimen baılanysty. Al sán salony qyzmetine júginetinder sany 30 paıyzǵa tómendegen. Ortasha kiris kólemi 5-10 paıyzǵa azaıdy. Qazaqstandyqtardyń tabysynyń tómendeýi buǵan basty sebep», -degen Assoıaııa prezıdenti qazirgi qıyn kezde nashar mamandar ketip, naǵyz kásibı mamandar iriktelip jatqanyn alǵa tartady.

Áıeldiń tabıǵaty eń aldymen sulýlyqpen úndesetinin eskersek, pandemııa kezindegi sán salondarynyń jabylýy men qashyqtan jumys isteý máseleleri osy sulýlyq pen áıel arasyn alshaqtata túskendeı. Sán salondary tabys kózinen aıyrylsa, al áıelder osyǵan deıingi kóriktiligin karantın jaǵdaıyna aıyrbastaǵandaı kórinedi.

Siz qalaı oılaısyz, qandaı jaǵdaı bolsa da, áıelder ádemiligin saqtaǵany durys pa, álde jaǵdaıǵa baılanysty salondardy shetke ysyrýy kerek pe?

Raýana DIMAShQYZY,

«Adyrna» ulttyq portaly.  

Foto ashyq derekkózden alyndy.

Pikirler