Ūlttyq keŋestıŋ basty eŋbegı – saiasi reformalar toptamasy

Aqparat jäne qoǧamdyq damu ministrı Aida Balaeva byltyr qūrylǧan Ūlttyq qoǧamdyq senım keŋesınıŋ bır jyldan astam uaqyttyŋ ışındegı jūmysyn qorytyndylady. QR Prezidentı Teleradiokeşenınıŋ YouTube arnasyndaǧy «Balaevaǧa 3 sūraq» baǧdarlamasynyŋ 6-şyǧarylymynda ministr Ūlttyq keŋestıŋ basty eŋbegı, jospary men keleşegı turaly oiymen bölıstı, dep habarlaidy QazAqparat tılşısı. Ministr Ūlttyq qoǧamdyq senım keŋesı qūrylǧannan berı bır jyldan endı asqanyn eske saldy. Osy uaqyt ışınde qoǧamdy eleŋ etkızgen bırşama şarua atqarylylǧan. Eŋ negızgı nätije retınde – saiasi reformalar toptamasyn aituǧa bolady. Atap aitqanda «Beibıt jinalystardy ūiymdastyru jäne ötkızu tärtıbı turaly» jaŋa zaŋ qabyldanyp, «Saiasi partiialar turaly», «Sailau turaly», «Parlament jäne onyŋ deputattarynyŋ märtebesı turaly» zaŋdarǧa özgerıster engızılgen. Qylmystyq kodekstıŋ 130-baby qylmys sanatynan alynyp tastalyp, Äkımşılık kodekske auystyrylǧan. 174- baptaǧy bas bostandyǧyna aiyru jazasy – aiyppūl salumen almastyrylǧan. «Ardagerler turaly» jaŋa zaŋ qabyldanyp, syrtqy qaryz bıryŋǧai reestrı bekıtıldı. Şeteldık jūmys küşıne kvota ekı esege qysqardy. Auyl şaruaşylyq jerlerın tiımdı paidalanu boiynşa kosmostan monitoring jobasy jüzege asyp, memleket menşıgıne 7 mln ga paidalanylmaityn jaiylym qaitaryldy. «Ūlttyq qoǧamdyq senım keŋesı bızdıŋ qoǧamda oi erkındıgı men pıkır aluandyǧyna şekteu joq ekenın körsettı. Ärine, keŋes öz jūmysyn «Halyq ünıne qūlaq asatyn memleket» qaǧidasymen alda jalǧastyra beretın bolady. Uaqyt talabyna sai, onda köterıletın mäseleler, ūsynystar ünemı jaŋaryp, jaŋǧyryp otyrady. Mysaly, jaqynda Ūlttyq keŋes müşelerınıŋ ūsynysymen mädeni-ruhani mäselelerdı damytu baǧytynda jaŋadan top qūrylatyn bolady. Iаǧni, Keŋes jūmysy, tek belgılı salalarda ǧana şektelıp qalmaidy. Ol qoǧamnyŋ barlyq salasyndaǧy kökeitestı mäselelermen ainalysady», - deidı Aida Balaeva baǧdarlama barysynda.