Qazaqstan bügıngı künge deiın nebır tar jol, taiǧaq keşulerden ötıp, äleumettık-ekonomikalyq, saiasi jaŋaru, ruhani jaŋǧyru jolynda senımdı alǧa jyljyp keledı. Jerımızge tabany tigen özge ūlt ökılderın halqymyzdyŋ erekşe jylylyqpen qarsy alǧany tarihtan belgılı. Elımız özge etnikalyq toptardyŋ ūlttyq tılderı men ädet-ǧūryptaryn, salt-dästürlerın damytuǧa da qoldau körsetuın toqtatqan emes. Osylaişa şaşau şyǧarmai, dostyq pen bırlıktı tu etıp, ortaq müddege jūmyldyryp otyr.
Alaida memlekettık tıldıŋ märtebesı älı de öz deŋgeiıne kelgen joq. Qazaq tılı – memleketımızdıŋ taban tıreitın tūǧyrly temırqazyǧy. «Ūlttyŋ saqtaluyna da, joǧaluyna da sebep bolatyn närsenıŋ eŋ quattysy – tıl», − deidı ūlttyŋ ruhani kösemı Ahmet Baitūrsynūly.
2019 jylǧy 31 jeltoqsanda Ükımettıŋ qaulysymen bekıtılgen «Qazaqstan Respublikasyndaǧy tıl saiasatyn ıske asyrudyŋ 2020 − 2025 jyldarǧa arnalǧan memlekettık baǧdarlamasynda» bylai delıngen: «Baǧdarlamada Memleket basşysy Q.K. Toqaevtyŋ 2019 jylǧy 2 qyrküiektegı «Syndarly qoǧamdyq dialog – Qazaqstannyŋ tūraqtylyǧy men örkendeuınıŋ negızı» atty Qazaqstan halqyna Joldauynda belgılengen mındetterdı jüzege asyru közdeledı. Memleket basşysy naqty şaralar negızınde elımızdegı etnikalyq toptardyŋ tılı men mädenietın damytuǧa jaǧdai jasau jäne qazaq tılınıŋ ūltaralyq qatynas tılı retındegı rölın küşeitu qajettıgın atap öttı. Osyǧan bailanysty Baǧdarlamada Qazaqstan aumaǧyndaǧy tereŋ tarihi, mädeni jäne psihologiialyq bazasy bar memlekettık tıldıŋ etnosaralyq qatynas tılı retınde tolyqqandy qoldanyluy qajettı şaralar közdelgen». Būl – memlekettık tıldıŋ pozisiiasyn nyǧaitu üşın jasalǧan maŋyzdy qadamdardyŋ bırı.
Memleket qūruşy ūlt töŋıregıne toptasyp, bır tılde söileu arqyly ǧana bırtūtas halyq bola alatynymyz anyq. Jerımız ortaq bolsa, tılımız de ortaq bolu kerek!
Quanyş Jūmabekūly PhD doktory, Ahmet Baitūrsynūly atyndaǧy Tıl bılımı institutynyŋ ǧylymi qyzmetkerı
