Elimizde sottalǵan jandar elektrondy dúkender arqyly meıramhana tamaqtaryna tapsyrys bere alady, dep habarlaıdy «Adyrna» ulttyq portaly QR IIM Qylmystyq-atqarý júıesi komıtetiniń baspasóz qyzmetine silteme jasap.
QAJ komıtetiniń tóraǵasy Janat Eshmaǵambetov IIM alańynda ótken onlaın brıfıngte jobanyń úsh óńirde júzege asyrylyp jatqanyn habarlady.
«2019 jyly biz QAJ mekemelerinde elektrondyq dúkenderdi engizý boıynsha pılottyq jobany iske qostyq. Joba úsh óńirde júzege asyrylýda. Bolashaqta biz bul tájirıbeni elimizdiń barlyq kolonııalary boıynsha engizýdi josparlap otyrmyz. Bul bizdiń júıemizdi reformalaýdyń asa mańyzdy baǵyty jáne sottalǵandardyń áleýmettik beıimdelýi úshin asa mańyzdy mánge ıe. Olar kolonııada turyp, ózderin qoǵamnyń bir bólshegi retinde sezine alady», - dep atap ótti ol.
Aldaǵy ýaqytta elektrondy dúkenderde taýarlardyń 400-den astam ataýy usynylatyn bolady. Olardyń qatarynda azyq-túlik, sýsyndar, turmystyq hımııa, keńse taýarlary, kıim-keshek bar.
Túrmedegilerdi baǵyp-qaǵý úshin jyl saıyn qansha aqsha jumsalady?
2018 jyly túrmedegi bir adamdy asyraý úshin bıýdjetten jylyna 877 myń teńge jumsalǵan. tengrinews.kz saıty osy jyldyń qyrkúıek aıynda ár sottalǵan adamǵa jylyna 1,1 mıllıon teńge bólinetinin habarlaǵan bolatyn. Alaıda keshe ótken brıfıng barysynda bul málimet joqqa shyǵaryldy. Komıtet keltirgen derekter boıynsha,elimizde 2021 jyldan bastap qamaýdaǵy bir adamǵa porııa máziriniń táýliktik normasy 1050 teńgeni quraıtyn bolady. Sondaı-aq, mınıstrliktiń tapsyrmasy boıynsha, keler jyly abaqtydaǵy tamaq máziri 33 tarmaqtan turatyn ónimge deıin kóbeıtilmek.
Búginde túrmedegilerdiń jazasyn óteý jaǵdaıyn órkenıetti elderdegideı jaqsarta túsýi myqtap qolǵa alynǵan. Dese de, sottalýshylardyń tek 40 paıyzy ǵana jumys isteıtin kórenedi. Iaǵnı, qalǵan 60 paıyz adamdy asyraý Úkimet esebinen júzege asyrylýda.
Dıana ASAN,
«Adyrna» ulttyq portaly
