Astana sotynyŋ baspasöz qyzmetınıŋ mälımetınşe, būl ıste bırneşe aiyptaluşy bar: Nūr-Sūltan qalasynyŋ altynşy şaqyrylymyndaǧy mäslihattyŋ būrynǧy hatşysy Janat Nūrpeiısov, qalalyq kölık jäne avtomobil joldary basqarmasynyŋ būrynǧy bastyǧy Raşid Amanjolov, "Astana Innovations" kompaniiasy basqarmasynyŋ būrynǧy töraǧasy Talǧat Äşım jäne tört käsıpker, enşıles kompaniia basşylary Däuren Äbdıhamitov, Ūlyqbek Achilov, Timur Kasabaev, Dulat Müsenov.
Olarǧa "ūiymdasqan top qūru jäne oǧan jetekşılık etu" jäne "özıne senıp tapsyrylǧan mülıktı iemdenu jäne jūmsau" baptary boiynşa aiyptar taǧylǧan.
Osyǧan deiın ıstı tergegen jemqorlyqpen küres ıs-qimyl agenttıgı "aqşa jymqyru shemasyn Nūr-Sūltan qalasy äkımınıŋ būrynǧy orynbasary Qanat Sūltanbekov, "Astana LRT" kompaniiasynyŋ būrynǧy basşysy Talǧat Ardan ūiymdastyrǧan" dep mälımdegen edı. Olarǧa halyqaralyq ızdeu jariialanǧan.
Tergeu organdarynyŋ mälımetınşe, şeneunıkter käsıpkerlermen bırge joba qūnyn jasandy türde qymbattatyp, jalǧan käsıporyndardyŋ kömegımen milliard teŋgenı qaǧaz aqşaǧa ainaldyrǧan.
Atyşuly "Astana LRT" jobacy 2009 jyly İmanǧali Tasmaǧambetovtyŋ elorda äkımı bolyp tūrǧan kezde bastalǧan. Metronyŋ ūzyndyǧy 41 şaqyrym bolyp bekıtılgen.
Al 2015 jyly Tasmaǧambetovtyŋ ornyna kelgen Jaqsybekov būl jobany "EXPO 2017" halyqaralyq körme tūsynda paidalanuǧa beremız dep uäde etken. Arada bır jyl ötkende qala äkımınıŋ orynbasary Sergei Horoşun jurnalisterge LRT qūrylysy 2017 jylǧa deiın salynyp ülgermeitının aitty. Äkımnıŋ sözınşe, bır jyl boiy qūjattarǧa qol qoiumen uaqyt ötkızgen.
Bas qalanyŋ äkımdıgıne Äset İsekeşov (2017 jyl - avt.) kelgennen keiın LRT ainalasynda sybailas jemqorlyqqa qatysty äŋgıme örbıdı. Äset İsekeşev «Astana LRT» JŞS qūrylysyn baqylau maqsatynda «LRT Construction» JŞS dep atalatyn jaŋa kompaniia qūrdy. Elbasy Nūrsūltan Nazarbaevqa hat joldanyp, jobanyŋ qūny qysqartylǧanyn mälımdedı. Saǧyzşa sozylǧan qūrylys 2019 jyldyŋ jeltoqsanynda paidalanatyny habarlandy. Bıraq Nūr-Sūltanǧa äkım bolyp kelgen Baqyt Sūltanov LRT jobasynyŋ toqtap qalǧanyn aitty.
2019 jyly mamyrda QR Premer-ministrınıŋ orynbasary Älihan Smailov LRT jobasynyŋ qūrylysy 2020 jyldyŋ 1 qyrküiegıne qarai aiaqtalatynyn aitty. Al äkım Altai Kölgınov jeltoqsan aiynda jobanyŋ tolyq aiaqtalatynyn, bıraq uaqytyn aitpady. Äkım alǧaşqyda 1,9 mlrd dollorǧa baǧalanǧan jobanyŋ 1,2 mlrd dollary ünemdelgenın jetkızdı. "Mamandarmen eseptep, bastapqy kezeŋde 10 minut jetkılıktı dep şeştık. Odan keiın jiırek bola bastaidy. Jer asty ötkelderdıŋ de sanyn qysqarttyp, nätijesınde 350 mln teŋge qarajat ünemdedık. Jalpy ünem kölemı şamamen 1,2 mlrd dollardy qūraidy. Körıp otyrǧandaryŋyzdai, joba bırşama arzandady. Tolyqtai alǧanda LRT-ny salyp bıtıru mındetı tūr. Sebebı köptegen dünie jasalyp, infraqūrylym tartylyp qoiylǧan,"- dedı äkım. Qazır metro jolynyŋ ūzyndyǧy – 22 şaqyrym.
Jasūlan Nauryzälı,
"Adyrna" ūlttyq portaly
