Kásipkerlik kókjıegi keńeıip keledi

2152
Adyrna.kz Telegram

Hromtaý aýdanynda memlekettik baǵdarlamalardyń arqasynda isin dóńgeletip otyrǵan kásipkerler qatary artyp keledi. Bıyldyń ózinde 200ge jýyq azamat “Eńbek” nátıjeli jumyspen qamtý jáne jappaı kásipkerlikti damytý” baǵdarlamasy aıasynda grant pen nesıe alǵan. Qazir olar sol qarjyǵa óz bıznesin ashyp, isterin dóńgeletip otyr. Biri qus ósirse, endi biri qoǵam suranysyna saı bıznespen shuǵyldanyp júr.

21 qazan kúni aýdanǵa arnaıy kelgen "Egemen Qazaqstan" gazetiniń Aqtóbe oblysy boıynsha menshikti tilshisi, jýrnalıst Baıan Sársembına memlekettik baǵdarlamalardyń berekesin kórip otyrǵan aýdan kásipkerlerimen kezdesip, júmystarymen tanysty.

2018 jyly «Bıznes bastaý» kýrsyn támamdap, óz isin bastaǵan úshinshi top múgedegi Uldaı Temirbekova Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy sheńberinde kýlınarııa isin ashý úshin 6 mln teńge kóleminde shaǵyn nesıe alyp, 2 adamdy jumyspen qamtyp otyr.

Óz isin bastaýda memlekettik baǵdarlamanyń kómegine júgingen jandardyń taǵy biri kóp balaly ana Rysjan Kýletenova. 2019 jyly "Bıznes Bastaý" arqyly kásipkerlik negizderin oqyǵan. Qaıtarymsyz grant utyp, nesibesin molaıtqan kóp balaly ana shashtaraz ashyp, halyqqa qyzmet kórsetýde.

Probaııa qyzmetinde tirkelgen Aleksandr Ivashenko da barshaǵa ortaq memlekettik baǵdarlamanyń bereketin kórip otyr. Halyqqa qyzmet kórsetý ortalyǵyna jumyssyz retinde tirkelgen ol "Bıznes Bastaý" jobasy aıasynda onlaın kýrstan ótip, qaıtarymsyz grantty jeńip alǵan. Búginde soǵylǵan qaqpalardy daıyndaıtyn sheberhanasyn ashyp, óz isin júrgizýde.

Memleketten qoldaý tapqandar qatary aýylda da jeterlik. Aýyldaǵy isker jandarmen tanysýǵa arnaıy Qudyqsaı aýylyna qarasty Oısylqara eldi mekenine at basyn burǵan jýrnalıst Baıan Sársembına aýyl sharýashylyǵynda 34 jyldan asa eńbek etken Qatıra Shakırovamen kezdesti. Aldymen názik jandy ananyń týǵan kúnine tap kelgen qutty qonaq - Baıan Sársembına 72 jasqa tolǵan Qatıra Shakırovaǵa tartý-taralǵysyn usynyp, quttyqtaý lebizin bildirdi.

Qart kásipker basshylyq etken «Nur» sharýa qojalyǵynyń negizi 2003 jyly qalanǵan. Qazirgi tańda qojalyqta myń bastaı aq bas iri qara maly, myń bastaı ıgaı tuqymdy jáne de jylqy maldary baǵylady.
Bul salany otbasylyq bızneske aınaldyrǵan Shakırovtar shańyraǵy qoı júnin óńdep, túrli buıymdar jasaý arqyly kásiptiń kókjıegin keńeıtken. Máselen, Tolqyn Shakırova arnaıy tehnıkamen óńdelgen qoı júninen qyz jasaýyn jasap, dástúrli ónerdi tabys kózine aınaldyrǵan. Ata kásiptiń násibin kórip otyrǵan ol aldaǵy ýaqytta júnnen jip ıirip, túrli buıymdar jasaýdy qolǵa almaq.

- Bıznes ıdeıalardy iske asyrý úshin «Bastaý Bıznes» kásipkerlik negizderine oqýǵa 90 adamǵa joldama berilip, barlyǵy grantqa ıe boldy. 2020 jylǵa Shaǵyn nesıeleý boıynsha 81 adamǵa 476 mln. teńge berý josparlandy. Onyń ishinde aýylǵa 71 adamǵa 256 mln. teńge qarjy bólinip, 66 adamǵa 332,6 mln teńge nesıe berildi. Qalaǵa 10 jobaǵa 220 mln. teńge qarjy bólindi, býgingi kúnge 8 adamǵa 51 mln teńge nesıe berildi. Reınvest boıynsha 5 adam- 25,5 mln. teńge aldy, -deıdi aýdandyq jumyspen qamtý jáne áleýmettik baǵdarlamalar bóliminiń basshysy Ulan Janalın.

Pikirler