Bügın Aqtöbedegı eŋ ırı joldardyŋ bırı Säŋkıbai batyr daŋǧyly paidalanuǧa berılıp, tūrǧyndardyŋ quanyşy artty. Ūzyndyǧy 3,3 şaqyrym bolatyn joldyŋ aşyluyna oblys äkımı Oŋdasyn Orazalin arnaiy qatysyp, BAQ ökılderınıŋ saualdaryna jauap berdı.
“Merdıger mekememen jasalǧan kelısım boiynşa qūrylysy mamyr aiynda bastalǧan joba jeltoqsan aiynda tolyq aiaqtaluy tiıs edı. Jürgızuşılerdıŋ qolailylyǧy üşın, kelısımde körsetılgen künnen erterek aiaqtaudy tapsyrdym. Tehnikalyq talaptardyŋ saqtaluy qataŋ baqylauda boldy”,- dep atap öttı Oŋdasyn Orazalin.
Öŋır basşysy sondai-aq, jol jöndeu kezınde tuyndaǧan uaqytşa kedergılerdıŋ bolǧanyn jasyrmady, jäne tūrǧyndardyŋ tüsınıstık bıldırgenı üşın alǧys bıldırdı. Aimaq basşysy taǧy bır quanyşty aqparatpen bölıstı. Aqtöbe - Qandyaǧaş küre jolynyŋ jöndeuıne qatysty joba maqūldanyp, qarjylandyru mäselesı şeşılgen. Oblys äkımı merdıger mekemege jöndeu jūmystaryna daiyndyqty biyldan qaldyrmai bastau kerektıgı turaly talap qoiǧan.
Aityp öteiık, Säŋkıbai batyr daŋǧyly 4-6 jolaqty, enı 15-22 metrdı qūraidy. Jol qūrylysy “JQJK” baǧdarlamasy aiasynda 1,5 mlrd tg qarjyǧa jasaldy. Oblys äkımı qala basşysyna trotuar, jaryqtandyru syndy qalǧan jūmystardy 25- qaraşaǧa deiın aiaqtaudy tapsyrdy.
