Azamattyq belsendi Dýlat Aǵadildiń beıitiniń basyna eskertkish qoıyldy. Monýmentti jýrnalıst Turarbek Qusaıynov óz qarajatyna jasatqan. Belgili saıasatker Záýresh Battalovanyń aıtýynsha, eskertishtiń ashylý rásimi 25 qarashada ótýi kerek bolǵan. Biraq Dýlat Aǵadildiń uly Janbolattyń qazasyna baılanysty ashylý rásimi keshe ótken.
"Kisi óltirý - bul qylmys. Al saıası kózqarastary úshin adam ómirin qııý - halyqqa qarsy jasalǵan esh keshirilmeıtin qastandyq.
Fotosýrette siz 2020 jyldyń aqpanynda QR Ishki ister mınıstrliginiń zyndanynda qaza tapqan belgili azamattyq belsendi Dýlat Aǵadildiń qurmetine jasalǵan eskertkish-músindi kóre alasyz. Qazaqstandyqtardyń kópshiligi Dýlattyń ólimi onyń áleýmettik-qoǵamdyq qyzmetimen baılanysty dep sanaıdy.
Bul monýment Qazaqstandaǵy parlamentarızmdi damytý qorynyń zańger-sarapshysy, Qazaqstandyq úkimettik emes uıymdary jónindegi adam quqyqtaryn qorǵaý jelisiniń múshesi, «Demos» qoǵamdyq birlestiginiń tóraǵasy, Halyqaralyq jýrnalıster federaııasynyń (IFJ) tilshisi Turarbek Qusaıynovtyń bastamasymen jáne jeke qarajatymen jasaldy.
Turarbek sonymen qatar "Men qalaı rýhanı jańǵyrdym", "Shyrmaýyq", "Zulmat: Shyǵys Túrkistannyń kúıreýi", "Saıası rejım qurbandary", "Aıdahardyń aılasy"atty kitaptardyń avtory.
Turarbek Qusaıynovtyń bostandyqtyń sımvoly, halyq batyry Dýlat Aǵadilge eskertkish jasaý týraly bastamasyn eń alǵashqy bolyp biz qoldadyq. 25 qarashada ótetin eskertkishtiń saltanatty ashylýyn josparlaǵan edik, biraq ókinishke oraı qaıǵyly jaǵdaıdyń oryn alýyna baılanysty eskertkishtiń ashylýy búgin Dýlat Aǵadildiń uly Janbolatty jer qoınyna tapsyrý, ıaǵnı jerleý kúni boldy.
Nelikten Qazaqstanda jazyqsyz adamdar qyrshynynan qıylyp jatyr?", - dedi Záýresh Battalova.
"Adyrna" ulttyq portaly
