Tailand bilıgı jüktılıktıŋ alǧaşqy 12 aptasynda jasandy tüsık jasatuǧa mümkındık beretın zaŋ jobasyn daiyndady, dep habarlaidy «Adyrna» ūlttyq portaly Bangkok Post basylymyna sılteme jasap.
Parlament ükımet ministrı bekıtken jaŋa zaŋdy 2021 jyldyŋ aqpanyna deiın qabyldaidy dep kütılude. Qūjat eldıŋ Qylmystyq kodeksıne ekı tüzetu engızbek. Zaŋ jobasy barlyq erejelerdı saqtai otyryp, ūryqtan aryluǧa kömektesken därıgerlerdı jauapkerşılıkke tartpaidy. Sonymen qatar, jüktılıktıŋ 12 aptasynan keiın jasandy tüsık jasatqan äielderge salynatyn aiyppūl mölşerın azaitpaq.
Būǧan deiın Tailandtyŋ Konstitusiialyq soty äielderdıŋ tüsık jasatuǧa tolyq qūqyǧy bar ekenın moiyndaǧan edı. Būl qauly 2021 jyly 13 aqpanda küşıne enedı. Sot şeşımıne säikes, 1957 jylǧy Qylmystyq kodekstıŋ baby Tailand konstitusiiasynyŋ 27 jäne 28-baptaryna qaişy keledı. Sebebı, olarda adamnyŋ teŋ qūqyǧy men bostandyǧy bekıtılgen.
Aita keteiık, ötken jyly elde 200 myŋǧa juyq äiel jasyryn türde tüsık jasatuǧa mäjbür bolǧan.
«Adyrna» ūlttyq portaly
