M.Áýezov atyndaǵy Qazaq memlekettik akademııalyq drama teatry 91-shi maýsymyn ashty. Kezekti demalysynan keıin qalyń kórermenderimen qaýyshýǵa asyqqan teatr ujymynyń jańalyqtary jeterlik.
Teatr basshylyǵy jyl saıynǵy dástúrge saı ótken maýsymyn qortyndylap, aldaǵy josparlarymen bólisý úshin BAQ ókilderimen júzdesti. Baspasóz máslıhatyna teatr dırektory, Qazaqstannyń eńbek sińirgen qaıratkeri Erlan Bilál, teatrdyń kórkemdik jetekshisi, KSRO halyq ártisi Asanáli Áshimov, dırektordyń keńesshisi, Qazaqstannyń halyq ártisi Esmuhan Obaev, rejısser, Qazaqstannyń eńbek sińirgen qaıratkeri Áýbákir Rahımov, teatrdyń ádebıet bóliminiń meńgerýshisi, Qazaqstannyń eńbek sińirgen qaıratkeri Álııa Bópejanova, aktrısa, Qazaqstannyń eńbek sińirgen qaıratkeri Danagúl Temirsultanova qatysty.
«Bıyl el Táýelsizdiginiń 25 jyldyǵy men qazaq óneriniń qarashańyraǵy sanalatyn M.Áýezov teatrynyń 90 jyldyǵy qatar kelip, bir ýaqytta toılanyp jatyr. Teatr óziniń 90 jyldyq mártebesin ataq-dárejesine saı keń aýqymda atap ótti. Búgin 91-maýsymnyń shymyldyǵyn teatrymyzdyń dástúrine saı M.Áýezovtiń «Abaı» tragedııasymen ashpaqpyz», – dedi teatr dırektory Erlan Bilál.
Baspasóz máslıhatynan keıin akterler sherýine ulasqan is-sharada teatrdyń kórkemdik jetekshisi Asanáli Áshimov: «Bizdiń barlyq ónerimiz – halyq úshin. El Táýelsizdiginiń 25 jyldyǵy men teatrdyń 90 jyldyq mereıtoıy aıasynda teatrda kóptegen is-sharalar uıymdastyryldy. Sonyń biri elimizdiń oblys ortalyqtaryna gastroldik saparmen baryp, 90 jylda jetken jetistikterimizdi saralap, halyqqa esep berý boldy. Aǵa, orta, jas býyn ókilderinen turatyn teatrdyń shyǵarmashylyq quramy kún ótken saıyn talantty jastarmen tolyǵýda. Búginde teatrymyz akademııalyq teatr bolǵanymen, «ulttyq teatr» degen atqa qyzmet etýdemiz», – dedi.
Al teatr dırektorynyń keńesshisi, Qazaqstannyń halyq ártisi Esmuhan Obaev óz kezeginde: «M.Áýezov teatry – qazaq dramatýrgııasyn, qazaqtyń akterlik mektebin álemge tanytqan, bereke-birligi jarasqan, ár isti jaýapkershilikpen, abyroımen atqaratyn qazaq óneriniń qarashańyraǵy, ata teatry. Teatr árkez halqynyń muńymen, qýanyshymen birge júredi. Teatr halyq úshin jumys isteıdi. Bul teatr – zamanaýı teatr. Qazirde kıeli sahnada oınaıtyn akterler negizinen jastar, soǵan saı kórermenderdiń deni jas býyn ókilderi. Bizdiń mindetimiz – izimizden ergen osy jastarǵa jol kórsetý, tilekshi bolý. Sizderdiń de búgingi tileýlerińiz qabyl bolsyn! Maýsym shymyldyǵyn ashaıyq, biz oılamaǵan, biz aıtpaǵan oıdy Uly Abaıdan estińizder!», – dedi.
Shymyldyq ashyldy. Sahnada – «Abaı». Bas keıipker rólinde – teatr dırektory Erlan Bilál. Ábdirahman rólin teatrdyń akterlik quramyna jýyrda qosylǵan Qazaqstannyń eńbek sińirgen qaıratkeri Qýandyq Qystyqbaev oınasa, Aıdar róli jas akter Aıan Ótepbergenge senip tapsyrylǵan eken. Teatrǵa jańadan qabyldanǵan jas akter, kórermen kóńilinen shyǵa bildi.
Jasulan Naýryzáli,
«ADYRNA».
