Qazaqstandyqtar ūltymyzdyŋ ūlyq merekesı – Täuelsızdık künın atap ötude. Bır oblysta avtokölıkterdıŋ şeruı ūiymdastyrylsa, basqa öŋırlerde otandastarymyz Tudy balkonǧa ılıp, jaŋa chellendj bastady, dep habarlaidy QazAqparat tılşısı. «Qūrmettı dostar! Qazaqstan Täuelsızdıgı künı qūtty bolsyn. Elımızdıŋ eŋ qasterlı meiramy qarsaŋynda Oslo törıne kök bairaǧymyzdy ılıp qoidym! Täuelsız Qazaqstan jasai bersın! Äleumettık jelını jylyna bır kün osyndai kök sary tüske endırıp, Kök tuymyzdy jelbıreteiık! Qūrmettı, dostar osy chelendjge barşaŋyzdy şaqyramyn!» - dep jazdy tanymal jurnalist Bibıgül Jeksenbai.
Chellendj keşeden berı bırqatar öŋırde qoldau tauyp otyr. Sonyŋ ışınde Qostanai oblysynyŋ halqy biık tūrǧyn üilerdıŋ balkondaryna Kök bairaǧymyzdy ılıp, ūlyq merekege qūrmetın bıldırude. Pavlodar oblysynyŋ köşelerındegı bannerlerde de Tuymyz köptep beinelengen. Memlekettık tu Öskemendegı Nūrsūltan Nazarbaev köşesınıŋ Uşanov alaŋy boiyndaǧy üilerdıŋ balkondaryna ılıngen. Jalpy Öskemendegı Botpai şyŋynda qaladaǧy eŋ ülken Tudyŋ ılıngen atap ötu kerek.
Osylaişa «Menıŋ Tuym, Menıŋ Otanym» aksiiasyna Qazaqstannyŋ barlyq derlık öŋırı ün qosyp jatyr. Aita keterlıgı, Memlekettık tudy paidalanu aiasyn keŋeitudı qazaqstandyqtardyŋ özderı ūsynǧan edı. Būl ideiany Memleket basşysy Qasym-Jomart Toqaev qoldap, memlekettık rämızderdı paidalanu qaǧidalaryn qaita qaraudy tapsyrǧan edı. Al osy aidyŋ basynda QR Premer-Ministrı Memlekettık tudy üilerdıŋ qasbetıne, balkondarǧa ıluge rūqsat beretın Qaulyǧa qol qoiǧan bolatyn.
