Jas dramatýrg Mádına Omarovanyń pesasy boıynsha belgili rejısser, QR eńbek sińirgen mádenıet qaıratkeri Ashat Maemırov «Aqtastaǵy Ahıko» qoıylymymen M.Áýezov teatrynyń repertýaryn mándi de maǵynaly dúnıemen baıytty. Tarıhtyń tiri kýágeri – Ahıko Teýronyń ómir jolyna úńilgen ujymnyń bul jumysy táýelsizdiktiń 25 jyldyǵyna tartylǵan tartýlarynyń biri.
Ahıko Teýro – Qaraǵandy oblysyna qarasty Aqtas dep atalatyn aýyldyń turǵyny. Ulty – japon. Qazirgi tańda 11 nemere, 5 shóbere súıip otyrǵan aqsaqal, 15 jasynda taǵdyrdyń aıdaýymen GÝLAG-tyń Qazaqstandaǵy eń iri lageri – KARLAG túrmesine túsedi. KARLAG-ta ultymyzdyń betke ustar qaımaqtarynyń otyrǵany, olardyń adam tózgisiz zorlyq kórgeni belgili. Jazyqsyz jala jabylyp, tar qapasqa qamalǵan Ahmet Baıtursynov pen Sáken Seıfýllınniń ákesi Seıfolla Ospanov ta zobalań kúnderin Ahıkomen birge ótkizedi. Sóıtip, jastyq shaǵy KARLAG-ta ótken japon jigiti 10 jyldan soń raqymshylyqqa iligedi. KARLAG-tan naǵyz jigittik shaǵynda shyqqan Ahıkonyń salmaǵy nebári 25 keli tartyp, qý súıegin súıretip shyqqan eken. Osydan-aq, keńestik ıdeologııa qurbany bolǵan arystarymyzdyń qandaı azapty kún keshkenin uǵýǵa bolady. (Qylyshynan qan tamǵan keńes zamanynyń ózinde Sh.Murtaza jazǵan «Qyzyl jebe» romanyndaǵy adam tózgisiz azaptaý bólek áńgime).
Qapastan qutylyp, ólim aýzynda jatqan Ahıkony taýyp alǵan qazaq áıeli ony baýyryna basyp, adam qataryna qosady. Keıin zaman ońalǵanda Ahıko ata jurty – Japonııaǵa baryp, ákesimen, baýyrlarymen, týǵan-týysymen tabysady. Kóp uzamaı ol Aqtasqa, ekinshi ret ómir bergen qazaq anasyna, adam qataryna qosqan qazaq baýyrlarynyń ortasyna qaıta oralady. Osynda shańyraq kóterip, urpaq órbitedi. Sóıtip, jastyǵyn qýǵyn-súrginde ótkizgen japon qazaq elinde birjola turaqtaıdy. Týǵan jerin súımegendikten emes, qazaq eline degen qurmeti úshin osyndaı qadamǵa bardy.
Jasulan NAÝRYZÁLI,
«ADYRNA».
