KAZGIýU Universitetı Basqarma töraǧasy Talǧat Närıkbaev qazaqstandyq JOO-lardyŋ rektorlaryn bılım salasyna äleumettık jauapkerşılıkpen qarauǧa şaqyrdy. Būl turaly ol joǧary oqu oryndarynyŋ rektorlarymen ötken kezdesude aitty. Jiynda 120-ǧa juyq universitettıŋ basşysy joǧary bılım salasyndaǧy özektı mäselelerdı köterıp, bılım sapasyn arttyru joldaryn talqylady.
«Qūrmettı ärıptester, barşaŋyzdy bılım salasyna biznes emes, äleumettık jauapkerşılık retınde qarauǧa şaqyramyn. Endı būrynǧydai memlekettık ülgıdegı diplomdar bolmaidy. Sondyqtan ärqaisysymyz el aldynda, studentter men ata-analar aldynda bılım sapasy üşın jauaptymyz. Bızdıŋ basty klientımız – studentter emes, jūmys beruşıler. Qazır bılım alyp jatqan studentter keiın bızdıŋ jäne balalarymyzdyŋ bolaşaǧyna yqpal etedı»,- dep atap öttı ol rektorlar kezdesuınde. Talǧat Närıkbaevtyŋ aituynşa, eger universitet studentten oqu aqysyn ala otyra eŋbek naryǧynda sūranysqa ie sapaly bılım bermese, ol alaiaqtyq dep esepteledı. «Tūtynuşy özı kütkendei sapaly bılım ala almaǧan jaǧdai da kezdesuı mümkın. Käsıbi qūzyrettılıgınıŋ tömendıgınen jūmyssyz qalǧan studentter nemese ata-analary oquǧa jūmsalǧan aqşany qaitarudy talap etıp, universitettı sotqa bere bastauy da mümkın», - deidı ol. Sondai-aq Talǧat Närıkbaev oqu prosesı men biznes-prosesterdı sifrlandyru ärdaiym aqşaǧa tırele bermeitının atap öttı. Universitettıŋ ışınde qandai problemalar bar ekenın, nätijelerı qai kezeŋde «toqtap qalatynyn» nemese būrmalanatynyn tüsınu üşın sapaly jäne tereŋ audit jürgızıp, prosesterge qanşa uaqyt jūmsalatynyn anyqtau qajet. «Ädette, joǧary oqu oryndary aşyqtyqty qalamaǧan kezde akademiialyq prosesterdı sifrlandyruǧa qarsy bolady. Sebebı bılım sapasyn baǧalaudyŋ, ötınışterdı qaraudyŋ jäne şeşımderdı qabyldaudyŋ ärbır kezeŋı köpşılıkke körınıp tūrady jäne saqtalyp qalady», - dedı Talǧat Närıkbaev. Atap öteiık, şara QR Bılım jäne ǧylym ministrlıgınıŋ Feisbuktegı resmi paraqşasynda tıkelei efirde körsetıldı.
«Adyrna» ūlttyq portaly
