Eŋselı Elordaǧa bastau alǧan ūzaq jol… Qolymda qalam, jürekte saǧynyş, köŋılde tolqu. Köŋıl men jürektegı ışkı sezım ūştasqanda aq qaǧazǧa tögıler oi da, qalamǧa bekem bailanǧan şeksız şer de erıksız aǧylary anyq. Ainalamda kedergı keltırer keskın joq.
Poiyzdyŋ tulaǧan dybysy, qasymdaǧy jol körşılerdıŋ tolassyz ösegı jäne jasy älı on jetıge jetpegen oiy lastanbaǧan, jaman ataulyny jaqsy düniege almastyrar säbi sanasymen kele jatyrǧan jetkınşek. Ony jetelegen şyǧarmaşylyq şabyt. Elordaǧa jetuımızge ekı kün bar. Demek ekı kün ömırımdegı eleulı sätterdı eske tüsırıp, estelık jazuǧa mūrşa bar.
Elordaǧa menı jetelegen arman jäne marqūm äjemnıŋ maǧan degen senımı. Jalǧyz qalǧan sätıŋde esıŋe ǧaşyǧyŋ nemese aspan öz älemıne alyp ketken aiauly jan elesteidı. Qūlaqqapta jan tynyştyǧyn sezdıretın saundtrek, köz poiyz terezesınıŋ arǧy betındegı zu etken şatqaldar men toly talda. Kezektı saparyma arqau bolǧan jas aqyndyq talabym. Talant deuge kelmes, öitkenı qazır aq paraqqa öleŋ şyǧaru jüiesınen alşaqtap kettım. Al sol kezdegı aqyndyq bala köŋıl menı talai jerge süiredı. Būl jolǧy stansiia Astana qalasy.
Estelıkterdı esırkep, kürmelengen tıldı jattyqtyryp otyrǧan kezımde kenet poiyz toqtap, jolda bır adamdy qaǧyp ketkenımızdı aityp, eleŋ etkızgen edı. Qanaty qataimaǧan, kökıregınde qorqynyş sezımı bar myna men būl suyq habardy estıgende elegızıp, aŋ taŋ küide boldym. Kupede otyz-qyryq şamasyndaǧy äpkei ekı qyzymen jäne aqsaqal bar. Aqsaqaldyŋ sözı tüzu, oiy jüirık eken. Jol jürgızuşısıne baryp, män jaidy tolyq bılıp, Qūdaiǧa qūlşylyq eter kezektı namaz uaqytynda qaitqan adamǧa dūǧa etıp, janyn jännattyq qyludy tılep älek. Şama şarqyny jetken adamnyŋ qūlşylyq etuden basqa baqytty kezı joq ekenın, öz önegesın örımdei jas, myna bızge aityp, bır kürsınıp qoidy.
Jazataiym jol apaty emestıgı aiqyn edı. Sebebı poiyz jolaǧy özge mäşınder jüretın joldan basqaşa. Ajalyna asyqqan jiyrma jastaǧy jıgıt eken. Ekı qolyn ūşardai etıp köterıp, poiyz astyna tüsıp, öz uaqytynan būryn jantäsılım etken jannyŋ būl ıs-äreketı menıŋ psihologiiama kerı äserın tigızdı. Öitkenı, mendegı jamandy jaqsy etetın säbi köŋıl qarama qaişy pıkırdı qalyptastyrdy. Janymda jaqynym joq kezde eresek ömırge bırden qadam basqandai küi keştım. Aqyndyq arǧymaǧyna mınıp, armanyma ılese, maqsatymmen jarysyp kele jatyrǧan myna jol maǧan pende piǧylynyŋ sondai pasyq bolatynyn, ünemı jaqsy dünieler oryn almaitynyna sendırdı.
Poiyzdaǧy bır kün şymşytyryq oqiǧamen ūştasyp ūzaq öttı. Kelesı künı ötken saǧattar synyn oilamas üşın kupelerdı aralap, şeker sūradym. Şeker jai syltau ǧoi, özım jasty ömırge ǧaşyq keiıpkerdı ızdestırıp jürgem. Ūzyn qolaŋ şaşyn ekı jaqqa jıberıp, tarap otyrǧan boijetkenge közım tüsıp qasyna bardym. Sälemı tüzu, jüzı jarqyn qyz eken. Bırden tıl tabysyp kettık. Menen bır jasqa ülkendıgı bolmasa, sanadaǧy oi bırdei. Jetımder üiınde tärbielengen jetkınşektıŋ ömırge tez aralasyp, beiımdelgenı türınen aq körınıp tūrǧan edı. Bır qyzyǧy ekeumızde bır alaman jarysqa bara jatyrmyz. Jolserık taptym. Menıŋ ekı jylda jazǧan elu şaqty öleŋım, Zerenıŋ tom kıtabynyŋ qasynda jai oi däpter sekıldı bop qaldy. «Qandai küştı, qalamyŋ ūştala bersın» degen bala tılegıme qatqan jauaby menı taǧy bır qadamǧa eseittı.
«Qalamym quanyştan jazsa igı edı. Mendegı paraqtar ana alaqany men äke aqylyna degen jetkızbes şeksız sara jol men şetsız saǧynyştan tuǧan jyrlar ǧoi…».Ekı kündık ūzaq jol jalǧan ömırdıŋ ūzyn bop körıngenımen sonşa qysqa ekenın ūqtyrdy. Jiyrma jastaǧy jas jıgıttıŋ öz ömırın rūqsatsyz, būiryqsyz qiiuy men jasy jetken aqsaqaldyŋ ömır üşın talasyp Allaǧa raqym etıp, amanşylyqty tılep jürgen qarama-qarsy beine. Qalamnyŋ quanyş pen qaiǧyǧa ortaqtyǧy. Menıŋ qalamym baqytty sätterdı jyrlasa, bırınıkı ardaqty ana alaqanyn aŋsaǧan saǧynyştan, küiınışten, joqşylyqtan jaza bastaǧan qalam, şyǧa bastaǧan öleŋ… Däl osy sätten keiın aqyndyq jol men üşın tars jabyldy. Būl sapar menı eseittı. Elordadan ekınşı oryndy qanjyǧaǧa bailap taǧy da oiǧa şomyp däl osy kupege mındım. Alda taǧy da ekı kün. Bıraq men jatatyn orynǧa jolai älı eşkım mıngen joq…
Inju ÖMIRZAQ
