28 aqpanda Azattyq radiosynyŋ tılşısı Qazis Toǧyzbaev 72 jasynda Almatydaǧy koronavirus auruhanasynda qaitys boldy. Odan koronavirus 25 qaŋtarda anyqtalyp, auruhanaǧa jatqyzylǧan, dep habarlaidy «Adyrna» tılşısı azattyq.org-ke sılteme jasap.
Jurnalistı 22 aqpanda klinikadan şyǧarǧanymen, keiın halı auyrlap qaita auruhanaǧa jetkızılgen. Al jeksenbıde jaqyndary onyŋ jüregı toqtaǧanyn habarlady.
Ol 2008 jyldyŋ qyrküiegınen berı Azattyq radiosynyŋ Qazaq qyzmetınde tılşı retınde jūmys ıstedı.
Zapastaǧy polkovnik Qazis Toǧyzbaev äskeri qyzmetınen soŋ jurnalistikaǧa, fotografiiaǧa bet būrdy. Oppozisiialyq "Söz" jäne "Azat" gazetterınde qyzmet ettı. kub.info saitynda blog jürgızıp, Almaty maŋyndaǧy Şaŋyraq audanynan jūrtty küştep köşıru jaily fotoreportajdar jariialady.
Ony ärıptesterı käsıbilıgı men jasyn syilap "Qazis aǧa" deitın. Äskeri tärtıp pen tık mınezı, şynşyldyǧy, senımdılıgı jäne jaisaŋdyǧy ärıptesımızdıŋ ruhty adam ekenın aiqyndap tūratyn.
Qazis Toǧyzbaev 2007 jyly qaŋtarda Qazaqstandaǧy demokratiialyq qūndylyqtardy damytuǧa qosqan ülesı üşın "Azattyq" syilyǧymen marapattaldy. Ol Azattyqtyŋ Qazaq qyzmetınde köbıne saiasi, adam qūqyǧy, äskeri taqyryptaryn jazdy. Azattyq redaksiiasy Qazis aǧaǧa auyr saiasi taqyryptardy tapsyratyn. Ol ärqaşan senımdı aqtap, tolymdy maqalalar joldaityn.
Qazis Toǧyzbaev - 2011 jyly jeltoqsanda Jaŋaözenge baryp, sol jaqtaǧy oqiǧadan alǧaş bolyp barǧan jurnalist. 2011 jyly jeltoqsanda bolǧan Jaŋaözendegı mūnaişylar ereuılınde polisiia narazylarǧa oq atyp, resmi derek boiynşa 17 adam qaitys boldy. Qazis aǧa Maŋǧystau oblysynan obektivtı reportajdar taratyp, Jaŋaözende ne bolyp jatqanyn der kezınde habarlap otyrdy.
Qazis aǧanyŋ "Zamanbek Nūrqadılovtıŋ ölımı. Üş ret atylǧan oq jäne rejimdı saqtap qalu joly", "Aron Atabektıŋ qapasta ötkızgen 14 jyldaǧy alǧaşqy ötınışı", "Sailaudan keiıngı bır jyl. Toqaev Nazarbaevtyŋ köleŋkesınen şyǧa aldy ma?", "Sovet kezınde quǧyndalyp, Nazarbaev tūsynda dissidentke ainalǧan Kärışal Asanov" syndy maqalalaryn oqyrman tarapynan köp oqylyp, köp talqylandy.
«Adyrna» ūlttyq portaly
