Aýylda ósken balamyz ǵoı, opera, balet degen dúnıelerdi keıin kórdik. Eń alǵash opera teatrynyń tabaldyryǵyn 2001 jyly Astanaǵa kelgende attadym. Onda da tegin bıletpen kirdim. Áıelim Kúlásh Baıseıitova atyndaǵy Ulttyq opera jáne balet teatrynda ártis bolyp jumys istedi. Bıletti ápergen de sol.
Áli esimde, «Don Kıhot» degen balet boldy. Qoıylymnyń bastalǵanyna 20 mınýt ótpeı jatyp, uıqym kele bastady. Bir qarasam, myzǵyp ketippin.
Spektakl ótkennen keıin «Qalaı unady ma?» dep surady. Balettiń tilin túsinetin adam sııaqty «Iıa, keremet» dep jaýap beremin uıalmaı. Biraq, ne bolyp, ne qoıǵanyn ózim bilmeımin.
Sóıtip júrip, aqyryn-aqyryn teatrǵa kele bastadym. Qoıylymdardy tastamaıtyn boldym. Sahnada áıelim án aıtady, men zalda otyramyn.
«Birjan-Sara», «Evgenıı Onegın», «Skazkı Gofmana», «Bogema», «Svadba Fıgaro», «Travıata», «Aıda», «Toska» degen operalardy eki-úsh márte kórip, jattap aldym.
Keıin úıge kelip, ekeýmiz spektaklderdi jatyp alyp talqylaıtynbyz.
Sóıtip júrip, men opera áleminiń esigin ashtym.
Keshe Shymkent qalasynyń Opera jáne balet teatrynda «Domalaq Ana» operasynyń premerasynda boldym. Ómirde bárin salystyryp qaraısyń ǵoı. Onyń ústine «Astana Opera», Abaı teatry, Bolshoı Teatr, Eýropa teatrlarynda úlken qoıylymdardy kórgen men shynymdy aıtaıyn, basynda bárine syn kózben qaraǵanym ras.
Biraq, qoıylymdy tolyq kórip shyqqannan keıin, teatr ujymyna basymdy ıdim. Keremet spektakl! Álemdik deńgeıdegi qoıylym.
"Domalaq Ana" — Táýelsizdik jyldarynda jazylǵan, sońǵy 30 jyldaǵy jalǵyz opera!!!
Árıne, men teatr synshysy emespin. Jańa premeralardy qalt jibermeıtin kózi qaraqty qarapaıym kórermen retinde óte joǵary baǵa beremin. Jaraısyzdar!
Unaǵan tustary:
1. Opera óte yqshamdalǵan nusqada qoıylǵan. II aktili qoıylymnyń uzaqtyǵy – shamamen 90 mınýttaı (1,5 saǵat). Bul qazirgideı ýaqyt tapshy kezeńde óte tıimdi ádis.
2. Jańa mýzykalyq format. Qoıylymnyń mýzykasyn jazǵan jas kompozıtor ekeni kórinip tur. Tasqyn Jarmuqamettiń eńbegin erekshe atap ótýge bolady.
3. Kórermendi jalyqtyryp almas úshin shoý-elementterdi qosqan. Mysaly, balet ártisiniń jalǵyz ózi bıleıtin (solnyı) nomeri. Shyǵys bıi zaldaǵy kórermenderdi bir serpiltip tastady. Maǵan qatty unady.
4. Spektaklde ıntrıga da bar. Maraý hanymnyń Domalaq Ananyń sábıin jerge laqtyryp jiberetin kórinisi. «Bala tiri me, álde ólip qaldy ma?» - dep degbiriń qashyp, typyrshyp otyrasyń.
5. Hor!!! Oryndaý sheberlikteri óte joǵary deńgeıde!
6. Árıne, Maıra Muhamedqyzy! Álemdik deńgeıdegi ártisti Shymkent sahnasynan kórý - úlken ǵanıbet!
Shymkent halqy (bári emes) kóbinese toı ánderin jaqsy kóredi. Osyndaı álemdik operalardyń jıi qoıylýy talǵamdy ózgertýge úlken áserin bereri sózsiz.
