Bas ustaıtyn dárejeli bıigińnen quldyrap qulap, sıraq usynǵanǵa máz bola quldyrańdaıtyn quldyq kebińnen qashan ajyrarsyń, Alash jurty? Sybaǵańdy syǵymdap ýystap, sylqıta asap jatqandarǵa syǵyrańdaǵan jaramsaq, jaltaq kózdi qashanǵy mólıte qadaı beresiń? Oıynshyq ustatqan baladaı eki ezýiń qulaǵyńa jetip, aspan men jerdi alaqaılaǵan «Súıinshińmen» jańǵyrtqanda, qazaǵyńa, halqyńa súıinish emes kúıinish qabattaıtyn kúlkiligińniń taǵy bir jelkeńnen jelkeletkenin uqpadyń-aý...
Óz elińde, óz jerińde otyrǵan, qazaq ulty-aý, ógeıletken ómirińnen bir ret julqyna atqyp turyp, azat eldiń týǵan uly bolyp, táýelsiz Otannyń asqaq azamaty bolyp, áli kúnge deıin bosaǵada qylqıǵan basyńdy tórge nege ozǵyzbaısyń? Ozsań, sonda ǵana anaý derbes aýdanyn tartyp alyp, ardaqty esimin Qaraǵandynyń bir túkpirine japsyra salǵan Qazdaýysty Qazybekti qorǵaı, qoldaı almaǵanyńdy sezer me ediń? Sonda ǵana 1991-diń qazanynda aty óshken Oktıabrdi aýdaryp tastaımyz dep torǵaıdy zeńbirekpen atqandaı berekesiz áreketińnen qyzarǵan betti basa, beze qashar ma ediń?
Qazaq respýblıkasynyń tuńǵysh Prezıdenti uly Álıhanǵa óziniń Qaraǵandysynyń, ne sonaý Petropavl, ne anaý Pavlodardyń atyn baıaǵyda-aq beretin óz ókimińdi nege iske asyrmaısyń, Alash jurty? Óz talap-talqyńdy nege oryndamaısyń, qazaq ulty?
Neden qorqasyń?
Elordanyń atyn bes-aq mınýt buryn Prezıdent atalǵan adamnyń bes mınýtqa jetkizbeı ózgerte salǵany esińnen shyǵyp ketip pe edi?
Kim sonda, Alash jurty, qazaq ulty, seni qorqytyp, úrkitip edi?
Eldiktiń erkindigin, táýelsizdiktiń taýandylyǵyn aıǵaqtap batyldyǵymen súıintetin shynaıy «Súıinshige!» ne jetsin.
Meni jaqtyrsańdar da, ýájimdi «mýsorkaǵa» laqtyrsańdar da óz erikteriń, qandastarym.
"Adyrna" ulttyq portaly.
