Resei Qazaqstanǧa qosymşa "Sputnik V" vaksinasynyŋ 4 million dozasyn jetkızedı, dep habarlaidy Qazaqstan premer-ministrınıŋ baspasöz qyzmetı.
Düisenbı künı Qazaqstan ükımetınıŋ basşysy Asqar Mamin Mäskeuge jūmys saparymen bardy. Ol Resei premerı Mihail Mişustinmen kelıssöz jürgızdı.
Kezdesu barysynda COVID-19-dyŋ taraluyna qarsy küres jäne ekı eldıŋ ekonomikasy üşın pandemiianyŋ saldaryn joiu jönındegı bırlesken şaralarǧa erekşe nazar audaryldy.
"Sputnik V" reseilık vaksinasynyŋ 4 million dozasyn Qazaqstanǧa qosymşa jetkızu turaly uaǧdalastyqqa qol jetkızıldı", - delıngen habarlamada. "Virustyŋ taraluyn jeŋu üşın bızdıŋ elderımızdıŋ küş-jıgerın, onyŋ ışınde halyqty jappai vaksinalau mäselelerınde üilestırudıŋ joǧary deŋgeiı qajet", - dep keltırdı Asqar Maminnıŋ sözın baspasöz qyzmetı.Ükımet basşylary, sonymen qatar, sauda-ekonomikalyq, qarjy-investisiialyq, energetika jäne ǧaryş salalaryndaǧy Qazaqstan-Resei yntymaqtastyǧyn odan ärı arttyru mäselelerın talqylady. EAEO formatyndaǧy özara ıs-qimyldyŋ özektı mäselelerı qaraldy. Būdan bölek, osy jyldyŋ ekınşı jartysynda Kökşetauda ötetın "Ekologiia jäne jasyl ösım salasyndaǧy yntymaqtastyq" taqyrybyna arnalǧan XVII Aimaqaralyq yntymaqtastyq forumyna daiyndyq mäselesı talqylandy. Aita ketsek, Qazaqstanǧa 1 aqpan jappai vaksinalau bastalardyŋ aldynda Reseiden "Sputnik V" vaksinasy bırınşı komponentınıŋ 22 myŋ dozasy jetkızıldı. Bügınde preparat tolyǧymen paidalanyldy.
