Şymkentke köşıp kelgen qandastar qalalyq jūmyspen qamtu jäne äleumettık qorǧau basqarmasyna qarasty «Qandastardy beiımdeu jäne yqpaldastyru ortalyǧynda» alty ai boiy tūrady. Osy uaqyt aralyǧynda ortalyqta qandastardyŋ elge beiımdeluı üşın bırneşe qyzmet türlerı körsetıledı.
Mūnda ata jūrtyn aŋsap kelgen aǧaiynǧa aldymen qazaqy salt-dästürlerımız ben ūlttyq qūndylyqtarymyz nasihattalady. Qyzmetkerler tüp-tamyrymyzdy tanuǧa mümkındık beretın türlı ädet-ǧūryptardy därıptep, türlı ūlttyq as mäzırın, qazaqy tūrmys-tırşılıktı därıpteidı. Būl olardyŋ elge tez beiımdelıp ketuıne oŋ äser etıp, baǧa jetpes qūndylyqtarymyzdy baǧamdauǧa mümkındık beredı.
Al psihologtar türlı treningter ūiymdastyryp, ärqaisysymen jeke jūmys jürgızedı. Sondai-aq, zaŋgerler qandastarǧa qūqyqtyq tūrǧydan kömek körsetıp, negızgı zaŋnamalardy tüsındıredı. Onymen qosa qandastardy türlı mamandyqtar boiynşa qysqa merzımdı oqytu kurstaryna baulyp, jūmysqa ornalasuyna da yqpal etedı.
Aita keteiık, bügıngı taŋda ortalyqta 12 otbasy tūryp jatyr. Jyl basynan berı qalaǧa köşıp kelgen 300-den astam müşesı bar 227 otbasyna qandas märtebesı berıldı.
Şymkent qalasy äkımdıgınıŋ baspasöz qyzmetı
