Būl turaly bügın Aqparattyq-kommunikasiialyq ortalyǧynda ötken brifingte Şymkent qalalyq Densaulyq saqtau basqarmasynyŋ basşysy Baqytjan Pozilov mälımdedı.
– Şymkent qalasyna osy jyldyŋ 31 qaŋtarynan bastap «Sputnik-V» vaksinasynyŋ I komponentıne 7400 doza, II komponentıne 5800 doza jetkızıldı. Iаǧni koronavirusqa qarsy reseilık ekpenıŋ bırınşı komponentı 7351, ekınşı komponentı 1876 adamǧa salyndy. Al ekpe qabyldaǧandarda kerı äser baiqalmaǧan, – dedı Baqytjan Joldasbekūly.
Spikerdıŋ sözınşe, qalada 11 PTR zerthanasy jūmys ısteidı. Atalǧan zerthanalar täulıgıne 6 270 test jasauǧa qauqarly. Tarqatyp aitsaq, şetelge şyǧatyn jolauşylar men özdıgınen tekserıluge niettı tūrǧyndar aqyly testıleuden ötedı. Al josparly türde PTR testın tapsyratyn barlyq sanattaǧy adamdarǧa synama tegın jürgızıledı.
Brifing barysynda basqarma basşysy koronavirus infeksiiasyn auyzdyqtaudyŋ jalǧyz joly vaksinasiialau ekenın alǧa tartty. Osy oraida ol qala tūrǧyndaryn ekpe saldyruǧa şaqyrdy.
Aita keteiık, üşınşı megapoliste vaksinasiialauǧa arnalǧan 38 egu punktı, 320 termokonteiner daiyndalǧan. Būl rette 1-2 säuır künı qalaǧa reseilık «Sputnik V» vaksinasynyŋ 7300 jäne otandyq «QazCOVID» vaksinasynyŋ 2400 dozasyn äkelu josparlanyp otyr.
Şymkent qalasynyŋ Aqparattyq-kommunikasiialyq ortalyǧy
Foto – Ernar Mamyr
