Saraıynda qaıtys bolǵan aǵasynyń denesin uzaq ýaqyt boıy jasyrǵan Atyraý oblysy, Mahambet aýdany, Tańdaı aýylynyń muǵalimine qatysty qylmystyq is qylmys quramynyń bolmaýyna baılanysty toqtatyldy, - dep habarlaıdy "Aq Jaıyq".
Eske salaıyq, bıyl qańtarda Tańdaı aýylynda 82 jastaǵy turǵyn Saǵynǵalı Aqberlıevtiń denesi tabylǵan bolatyn. Er adam qaryndasymen birge turǵan, ol mektepte muǵalim.
Aýyl turǵyndarynyń sózinshe, sońǵy ýaqyttary er adamdy eshkim kórmegen, sóıtip onyń týystary alańdaı bastaǵan. Artynsha áıel adam birneshe aı boıy aǵasynyń denesin úıdiń saraıynda jasyrǵany anyqtaldy. Onyń mundaı áreketke ne úshin barǵany belgisiz.
Áleýmettik jelide áıel adam aǵasyn byltyr jazda óltirip, artynsha denesin bólshektep, úlken sómkege jasyryp qoıǵany týraly aqparat tarady. Tergeý ýaqytynda áıel adam jumystan bosatyldy.
Alaıda zeınetkerdi bireý óltirgeni rastalmady. Saraptama er adam ózi qaıtys bolǵanyn kórsetken.
"Is toqtatylǵanyn bilemiz. Onyń jumysqa qaıta kelýine baılanysty - biz aýdandyq prokýratýradan jaýap kútemiz. Buǵan qatysty basqa eshteńe aıta almaımyz", - dedi Ahmedııarov atyndaǵy orta mektep dırektory Serik Qoıbaqov.
Alaıda ata-analar muǵalimniń mektepte jumys isteýine qarsy. 206 adam Baqsaı aýyldyq okrýgine, aýdan prokýroryna, oblystyq bilim basqarmasy men Nur Otan-nyń bólimshesine ótinish jazǵan.
"Onyń nelikten aǵasynyń denesin talaı ýaqyt jasyryp, ony kórmegenin aıtqany túsiniksiz. Ondaı adam mektepke oralǵanyna jáne balalarymyzdy oqytqanyna qarsymyz. Eger jergilikti bılik ótinishimizdi qarastyrmasa, prezıdent pen bilim mınıstrine júginemiz. Eger ol jumysyn jalǵastyrsa, keıbir ata-ana balasyn mektepke aparmaýǵa daıyn", - delingen aýyl turǵyndarynyń ótinishinde.
