Qazaqstan men Reseıdiń beıbit atomdy qoldaný boıynsha áriptestigi alǵa jyljyp keledi deıdi Reseı elshisi Alekseı Borodavkın. Reseı Qazaqstanǵa AES salǵysy keletini jaıly baıandady, dep habarlaıdy "Adyrna" ulttyq portaly Abai.kz-ke siltep.
"Qazaqstan atom elektrstanııasyn salý týraly sheshim shyǵarsa, Reseı salýǵa daıyn", — dedi Reseı elshisi Borodavkın "Reseı jáne Qazaqstan: strategııalyq áriptestiktiń 30 jyldyǵy" atty halyqaralyq ǵylymı-tájirıbelik konferenııada.
Ol Qazaqstan men Reseı arasyndaǵy túrli sala boıynsha áriptestik alǵa jyljyp kele jatqanyn tilge tıek etti. Elshiniń kózqarasy boıynsha Eýrazııa keńistigindegi halyqtar jyl ótken saıyn bir-birimen áriptestikti arttyrýǵa múddeli bolýda.
"Qazaqtar men orystar Uly Otan soǵysynda birge soǵysyp, fashıstik Germanııany talqandady. Dál Qazaqstan jerinen adamzat ǵaryshqa qadam jasady. Qazaqstanda KSRO-nyń ıadrolyq qalqany jasaqtalyp, Úshinshi dúnıejúzilik soǵystyń qaýpi seıildi. Biz KSRO kezindegi repressııany da, 30-jyldary bolǵan ashtyq pen halyqtardy kúshtep qonystandyrýdy da, ıadrolyq synaqtardyń áserin de este saqtap kelemiz. Bulda bizdiń ortaq tarıhymyz ǵoı", — dedi Borodavkın.
Elshi Qazaqstan men Reseı búginde teń quqyqty odaqtas ári áriptes ekenin aıta ketken.
"Bizdiń áriptestigimiz koronavırýspen kúres kezinde aıqyn kórindi. Reseı Qazaqstanǵa aýqymdy kómek berýdi jalǵastyryp keledi. Dárigerler men ǵalymdar arasyndaǵy áriptestik artty. Qazaqstanǵa reseılik "Spýtnık V" vakınasyn jetkizý qarqyny artýda, al Qaraǵandyda vakına shyǵarý jolǵa qoıyldy", — deıdi Reseı elshisi.
Esterińizde bolsa el prezıdenti Qasym-Jomart Toqaev 2019 jyly Qazaqstanda atom elektrstanııasyn salý josparda joq ekenin, AES salý qajet bolsa referendým arqyly halyq sheshetinin aıtqan edi.
Bul Reseı elshisiniń alǵashqy AESqa qatysty alǵashqy pikiri emes. 2021 jyldyń 10 aqpanynda: "Qazaqstanǵa álemdegi basqa elder sııaqty taza energııa qajet. Osy saladaǵy eń tıimdi sheshimderdiń biri - atom elektr stanııalary. Elektr energııasynyń tapshylyǵyn eskere otyryp, AES salý Qazaqstan úshin ózekti taqyrypqa aınalýda. Rosatom zaýyttyń qaýipsizdigi men ekologııalyq tazalyǵyna kepildik bere otyryp, bul jobany qabyldaýǵa daıyn. Keıbir aqparat quraldarynda taratylǵan orys atomy týraly fobııalardyń shyndyqqa janaspaıtynyn atap ótkim keledi. Reseılik AES-tarda qoldanylatyn eń zamanaýı tehnologııalar qurylys kezinde de, osy obektilerdi paıdalaný kezinde de qaýiptiń bolmaýyn qamtamasyz etedi. Sonymen qatar, AES jobasy elektr energııasynan basqa Qazaqstan ekonomıkasynyń kóptegen salalaryna serpin beredi, bilikti jumys oryndaryn ashady jáne ıadrolyq fızıka salasyndaǵy joǵary bilim sapasyn arttyrady",- degen edi Reseı elshisi.
Qazaqstan halqy men sarapshylar AES salýǵa óz qarsylyǵyn bildirip keledi.
"Adyrna" ulttyq portaly
