«El-Shejire» qaıyrymdylyq qory» qoǵamdyq qory Almaty qalasy Ishki saıasat basqarmasy usynǵan «Ádebıet álemi» áleýmettik jobasy aıasynda, Dıdahmet Áshimhanuly atyndaǵy ádebı birlestiktiń múshelerimen birlesip Elbasynyń «Bolashaqqa baǵdar: rýhanı jańǵyrý» maqalasy negizinde jas aqyndardyń múshaırasyn ótkizdi.
Oǵan Almaty temirjol kóligi kolledji, Almaty servıstik qyzmet kórsetý kolledji jáne Almaty jolaýshylar kóligi jáne tehnologııalar kolledjiniń stýdentteri qatysty. Jas aqyndardyń ónerine atajurtynyń topyraǵyna taban tiregen jazýshy Qytaı Halyq Respýblıkasynyń Memlekettik syılyǵynyń laýreaty Tursynáli Ryskeldi, Jazýshylar odaǵynyń múshesi, ǵalym Nurdáýlet Aqysh, jazýshy-jýrnalıst Kólbaı Adyrbekter qazylyq etti. Jastardyń óleń qurap, ony sheberlikpen jetkize bilgen talaptaryna qaraı Álııa Almasqyzy, Ábilqaıyr Qanapı, Dinmuhammed Quljanovtar tıisinshe birinshi, ekinshi jáne úshinshi oryndardy ıelendi.
Shara sońynda sóz alǵan Almaty temirjol kolledji dırektorynyń orynbasary Marhaba Kókenova: «Bizdiń kolledj temirjol salasynyń mamandaryn daıarlaıtyn oqý ordasy bolǵanymen, ádebıetke qushtar shákirtterimiz bar. Bul óz kezeginde olardyń eli men jerine degen súıispenshiligin arttyrady. Meniń oıymsha kim qandaı mamandyq ıesi bolsa da, sóz ónerinen habary bolýy tıis» degen pikir bildirip, uıymdastyrýshylarǵa alǵys aıtty. Múshaıraǵa belsene qatysqan barlyq stýdentterge Alǵys hattar men kitaptar tabys etildi. Olardyń arasynda atalǵan oqý ordasynyń jas ustazy Stybek Aıdana da bar. Ol «Táýelsizdikke arnaý» atty óleńimen kópshiliktiń kóńilinen shyqty.
Dinmuhammet Muhammetjan
ál-Farabı atyndaǵy QazUÝ-dyń jýrnalıstıka fakýltetiniń stýdenti
