Lýkashenko qaıtys bolǵan jaǵdaıda bıliktiń aýysýy týraly Jarlyqqa qol qoıdy

3445
Adyrna.kz Telegram

Belarýsııada «Egemendikti jáne konstıtýııalyq qurylysty qorǵaý týraly» 2021 jylǵy 9 mamyrdaǵy № 2 dekretke qol qoıyldy. Qujatta Aleksandr Lýkashenko qaıtys bolǵan jaǵdaıda bıliktiń Qaýipsizdik keńesine ótýi qarastyrylady. Bul týraly onyń baspasóz qyzmeti jazdy, dep habarlaıdy «Adyrna» tilshisi.

Qujattyń tolyq mátini ázirge jarııalanbady. Habarlamada qastandyq jasaý, terrorızm aktisi, syrtqy agressııa jáne ózge de kúsh qoldaný áreketteri saldarynan Memleket basshysy qaza tapqan jaǵdaıda barlyq memlekettik organdar men olardyń laýazymdy adamdary premer-mınıstr tóraǵalyq etetin Qaýipsizdik keńesiniń sheshimine sáıkes áreket etetinderi aıtylǵan.

Bul rette el aýmaǵynda tótenshe nemese soǵys jaǵdaıy dereý engiziledi, al Qaýipsizdik keńesi olardy qamtamasyz etý jónindegi sharalar tizbesin aıqyndaıdy. Keńes beketken sheshim mindetti túrde oryndalýy tıis.

Negizgi másele – saılaýdy ótkizý jospary. Qaýipsizdik keńesi ákimderdiń qatysýymen sharany júzege asyrý týraly sheshim qabyldaıdy.

Baspasóz qyzmetiniń málimdeýinshe, Jarlyq eldiń táýelsizdigi men egemendigin saqtaýǵa baǵyttalǵan. Qujat qol qoıylǵan sátten bastap kúshine enedi.

«Adyrna» ulttyq portaly

Pikirler