Sháýýál aıynda orazany qalaı tutý kerek?

Ramazan aıynyń orazasy (30 kún) + Sháýýál aıynyń orazasy(6 kún) = 1 jyl oraza

Bul Alla Taǵalanyń bizge bergen uly Meıirimi. Az ǵana amal jasap, on ese saýap alý – jaqsy tabys kózi jáne keremet kelisim.

Osyǵan oraı, bizge osy aıdaǵy orazany qalaı ustaý kerek: úzilissiz be álde arasynda úzilis jasap pa, Ramazandaǵy qaryzdardy ótegennen soń ba álde ótemes buryn ba, qaı kúnderi, qaı ýaqytta degen tolassyz suraqtar kelip túsýde.

Sol sebepti biz Sháýýál aıyndaǵy orazaǵa qatysty jıi qoıylatyn suraqtarǵa jaýap berýdi uıǵardyq:

Áıelder, sapardaǵylar men Ramazan aıynda syrqattanyp ıa bolmasa belgili sebeptermen ári sebepsiz orazasyn qaza qylǵandar Ramazandaǵy qaryz orazany kelesi Ramazanǵa deıin mindetti túrde óteý shartymen  Sháýýál aıynda oraza tuta alady.

Alaıda, eger birinshi Ramazan aıyndaǵy qazany toltyryp, artynan Sháýýál aıynyń alty kúnin ustaý unamdy amal bolyp tabylady.

Soǵan qaramastan, eger adam úlgermeı jatsa nemese Sháýýál aıy aıaqtalǵansha alty kúndi ustaı almaı qalamyn dep qaýiptense, kerisinshe de jasaýǵa bolady

Iaǵnı, Sháýýál aıynyń ekinshi juldyzynan bastap Ramazan aıynyń qazasyn ótep, odan ári Sháýýál aıynyń nápil orazasyn ustaýǵa bolady.

Alaıda, olar bir jyldyq oraza tutqannyń saýabyn ala almaıdy. Sebebi ondaı saýapty alý úshin, hadıste kelgendeı, paryz bolǵan orazany mindetti túrde ustaýy qajet.  Soǵan qaramastan, Alla qalasa, olar Sháýýál aıyndaǵy alty kúndik orazanyń saýabyn alady.

Degenmen, olar úshin Ramazandaǵy qazanyń ornyn tolyqtyrý haıyrly. Sebebi paryzdy qaldyryp qoıý Allanyń aldynda úlken kúná bolyp sanalady.

Eger Ramazan aıynda eshqandaı qazasy bolmaǵan jandar bolsa, Sháýýál aıynyń orazasyn dúısenbi jáne beısenbi kúnderi ustalatyn súnnet orazasy kúnderi aýyz bekitýine bolady. Alaıda, bul bir joly ǵana. Sháýýál aıynyń qosymsha orazasyn qaı kúni ustaý ár adamnyń jeke basynyń isi.

Tań namazy men aqsham namazynyń ýaqyttary qaı kezde kiretinin bilý úshin saıtymyzdaǵy "Namaz ýaqyttary" aıdaryna kirip, óz qalańyzdy tańdap, sol jerden anyqtaı alasyz.

Tań namazy – aýyz bekiter ýaqyttyń bastalýy. Bul degen sóz, sáresi ishýdi jáne orazany buzatyn amaldardy (erli- zaıyptylarǵa jynystyq qatynasty, tis tazalaý barysynda tis pastasy jutyp qoıý, taǵy basqa ) toqtatý qajet degen sóz. Ramazan aıyndaǵy orazany buzatyn amaldyrdyń barlyǵy da kez kelgen orazany da buzady.Aqsham namazynyń ýaqyty – aýyz ashatyn ýaqyt. Kún uıasyna bata salysymen musylman adam orazada tyıym salynǵan amaldardy jasaýyna bolady.