Májilis depýtattary Qazaqstanda 18 jasqa deıingi ár balaǵa ortasha jalaqy mólsherinde jalpyǵa birdeı járdemaqy engizýdi usyndy, dep habarlaıdy "Adyrna" ulttyq portaly derekkózge siltep.
Bul máseleni depýtat Aıjan Sqaqova kóterdi. Onyń aıtýynsha, elimizde jumys istemeıtin áıelderge aı saıynǵy bala kútimine járdemaqy bylaı tólenedi: birinshi balaǵa - 16 802 teńge, ekinshisine - 19 865 teńge, úshinshisine - 22 898 teńge, tórtinshi jáne odan kóp balalarǵa - 25 961 teńge. Bul bir balaǵa kúnine 560-865 teńge degen sóz, al bir sábıdiń tamaǵyna 1018 teńge jumsalady. Járdemaqynyń ishinde balanyń anasyna aqsha qarastyrylmaǵan.
"Eger erli-zaıyptynyń bireýi ǵana jumys istese jáne otbasynda úsh bala bolsa, onda árqaısyna 46 myń teńgeden keledi, bul óte az.
Azyq-túlik, kıim, dári-dármek, oıynshyqtar, kitaptar qansha turatynyn bilemiz, sonymen qatar ár otbasynda birdeı páterdiń kommýnal qyzmetteri nemese nesıe tóleý sııaqty basqa da kóptegen shyǵyndary bar. Al balalarda eń negizgisi fızıologııalyq qajettilikter ǵana emes, sonymen birge bilim alý, damýdyń da áleýmettik qajettilikteri bar. Jáne de mynany túsiný kerek: eger biz balalar aldyndaǵy boryshymyz tek olardyń aman-esen, toıyp tamaqtanýy úshin jaǵdaı jasaý dep eseptesek, onda olardan erteńgi kúni eshbir umtylysty kúte almaımyz. Járdemaqyny ulǵaıtý kerek", - dedi depýtat.
Depýtat rásimderdiń kóptigi, olardy basqarýdyń qıyndyǵy járdemaqy alý kezinde sybaılas jemqorlyq shemalaryn týdyratynyn aıtty.
Sondaı-aq, Aıjan Sqaqova osal toptaǵy qazaqstandyqtar úshin turǵyn úı qoljetimdi emes ekenine nazar aýdardy. Onyń aıtýynsha, Almatyda turǵyn úı alý kezeginde 26 myńnan asa otbasy tur. Turǵyn úıdi kútýdiń eń az merzimi 10 jyldan asady. Ol qolda bar memlekettik baǵdarlamalar jetkiliksiz dep sanaıdy.
Parlament múshesi Qazaqstannyń Halyq partııasy saılaýaldy baǵdarlamasynda árbir otbasy úshin 20 sotyq jer berý kerek dep málimdegenin aıtty. Onyń pikirinshe, muny birinshi kezekte aýyldyq jerlerde kópbalaly, tolyq emes, az qamtylǵan, sondaı-aq, múgedek balalary bar otbasylarǵa berý kerek.
"QHP frakııasynyń depýtattary járdemaqylar men tólemderdiń barlyq túrin qysqartýdy jáne 18 jasqa deıingi árbir balaǵa bir ámbebap járdemaqy engizýdi usynyp otyr, ol Qazaqstanda týý jáne azamattyǵy quqyǵy boıynsha barlyq balaǵa ortasha jalaqy somasynda taǵaıyndalady. Járdemaqy balanyń qajettilikterin bizdiń partııa ázirlegen balalar tutyný qorjynyna jáne bala kútimi kezeńindegi ananyń qajettilikterine sáıkes jabýy kerek", - dedi Sqakova Májilis otyrysynda.
"Adyrna" ulttyq portaly
