Nur-Sultandaǵy kópbalaly analar Eńbek jáne halyqty áleýmettik qorǵaý mınıstrligi aldyna jınaldy. Olar kún saıyn qymbattap jatqan azyq-túlik baǵasy men áleýmettik jaǵdaıdyń tómendigine shaǵymdandy. Shápkenovten jaýap suraı kelgen topqa mınıstr shyqpaǵan soń, olar joǵary bıliktegilerge qaraı bet aldy. Alaıda joldy bógegen arnaıy jasaq jınalǵan topty ary asyrmady, dep habarlaıdy «Adyrna» ulttyq portaly Stan.kz saıtyna silteme jasap.
Jınalǵandar buǵan deıin birneshe ret túrli mınıstrlikke hat jazyp, úndeý joldasa da mardymdy jaýap ala almaǵan eken. Endi olar halyqtyń áleýetine jaýap beretin mınıstrlik basyshysymen tikeleı júzdesýge kelgen.
«Birinshi másele ol baspananyń qoljetimsizdigi. Búgingi tańdaǵy «Baqytty otbasy», «Shańyraq» baǵdarlamalary boıynsha áleýmettik osal topqa úı alý múmkin emes. Ekinshi másele, azyq-túliktiń baǵasy», - deıdi qoǵam belsendisi Qanaǵat Shúmenova.
Halyqtyń turmysyn túzeý úshin analar barlyq balaǵa 18 jasqa deıin 42500 teńge járdemaqy tólenýi kerek deıdi. Óıtkeni sońǵy kezde mekenjaı boıynsha beriletin áleýmettik tólemniń de kólemi qysqaryp qalypty.
Al mınıstr ornyna shyqqan mınıstrlik ókili bul múmkin emes ekenin aıtady.
Mınıstrliktiń basqarma basshysynyń jaýabyna qanaǵattanbaǵan azamattar joǵary bılik pen depýtattarmen tildesemiz degen úmitpen toptasyp úkimet úıine bet aldy. Al dál osy ýaqytta májiliste bala kútimine tólenetin járdemaqyny úsh jasqa deıin kóterý, jalǵa beriletin úıdi satyp alý quqyǵyn qaıtarý, ár balaǵa 18 jasqa deıin ortasha aılyq eseptik kórsetkish kóleminde járdemaqy tóleý máselesi qaralyp jatqan edi.
«Áleýmettik osal topqa saı keletin turǵyn úı baǵdarlamasyn ázirleý. Onyń paıyzdyq mólsherlemesi 0-ge teń jáne alǵashqy jarnasy bolmaýy kerek», - dedi QR Parlamenti Májilisiniń depýtaty Aıjan Sqaqova.
Sondaı-aq depýtattar aýyldyq jerde turatyn ár otbasyǵa 20 júzdik jer berý kerek degen de usynys aıtty. Alaıda ár qazaqstandyqqa zań boıynsha tıesili 10 júzdik berilmeı otyrǵanda depýtattardyń bul usynysy aıdy aspannan alyp ber degenmen birdeı sııaqty.
"Adyrna" ulttyq portaly
