QR BǦM Ūlttyq testıleu ortalyǧynyŋ direktory Didar Smaǧūlov qyzmetınen kettı, dep habarlaidy «Adyrna» tılşısı. Būl turaly ol Facebook jelısındegı paraqşasynda jazdy.
«Dostar, men Bılım jäne ǧylym ministrlıgınıŋ Ūlttyq testıleu ortalyǧynyŋ direktory qyzmetınen öz erkımmen ketu turaly şeşım qabyldadym. 7 jyl boiy memlekettık qyzmette eŋbek ettım. Endı özımdı basqa salada synap köretın kez keldı. Dostar, maǧan ünemı qoldau körsetkenderıŋızge alǧysym şeksız. Osynyŋ arqasynda köp jūmys atqaryldy. Sondai-aq, elımızdıŋ Bılım jäne ǧylym ministrıne de alǧys aitqym keledı. Maǧan qatysty aitylǧan qanşama synǧa qaramastan būl qyzmette maǧan senım arta bıldı. Halyqqa adal qyzmet etu üşın jäne sızderdıŋ senımderıŋızdı aqtau üşın men özımnıŋ bar jiǧan bılımım men qabıletımdı osy ortalyqtyŋ örkendeuıne baǧyttauǧa tyrystym. Osy salada ūsynylyp jatqan basqa da basşylyq lauazymdar üşın rizaşylyǧymdy bıldırem. Alaida maǧan qyzmet salasyn säl özgertu qajet dep şeştım. ŪBT-men qoş aityspaimyz. Aldaǧy uaqytta qyzmetımdı ministrdıŋ sybailas jemqorlyqqa qarsy ıs-qimyl mäselelerı jönındegı ştattan tys keŋesşısı retınde jalǧastyrmaqpyn (qandai da bır tölemsız)", - dedı Smaǧūlov.
«Adyrna» ūlttyq portaly
