Mańǵystaý oblysynda óli qabylan tabyldy. Onyń vıdeosyn ekobelsendi Sáken Dildahmet Instagram-da jarııalady, - dep habarlaıdy “Adyrna” ulttyq portaly Tengrinews.kz saıtyna silteme jasap.
"2021 jyldyń 9 maýsymynda áleýmettik jelilerde Mańǵystaý oblysyndaǵy óli qabylan týraly aqparat paıda boldy. Bul osy aımaqtaǵy ekinshi jaǵdaı", - dep jazdy Dildahmet.
Onyń aıtýynsha, 2015 jyly Jańaózende jergilikti turǵyndar bir qabylandy óltirgen. Osy oqıǵadan keıin 2018 jyly taǵy bir qabylan Ústirt qoryǵynyń aýmaǵyna kirgeni tirkeldi. Alaıda ol da óldi.
"Ókinishke qaraı, bul Mańǵystaý oblysyndaǵy ekinshi derek. Ań adam qolynan ólse, onda quqyq qorǵaý organdary kináli adamnyń kim ekenin anyqtaý úshin barlyq sharany qabyldaýy kerek", - dedi ol.
Aıta keteıik, 2021 jyly qabylan (aldyńǵy azııalyq túri) Qazaqstannyń Qyzyl kitabyna endi.
