Jelide Qytaı mektebindegi sońǵy qazaq synyby túlekteriniń vıdeosy tarady. Facebook qoldanýshysy Erqanat Tursynjanulynyń sózinshe, bul mekteptegi qazaq tilindegi eń «Sońǵy qońyraý». Budan bylaı mektep tek qytaı tilinde bilim beredi, dep habarlaıdy «Adyrna» ulttyq portaly kaz.nur.kz saıtyna silteme jasap.
Áleýmettik jelide taraǵan vıdeo kóptiń júregin aýyrtty.
«Qazaq tiliniń sońǵy túlekteri... Qytaıdyń Kúnes aýdanynda qazaq synybynyń sońǵy túlekteri mektep bitirdi. Mektep bitirý keshinde qazaqsha «Sońǵy qońyraý» áni aıtyldy. Qazaq tilindegi eń sońǵy qońyraý... Endi budan bylaı mektepte tek qytaı tili oqytylady», - dep jazdy Erqanat Tursynjanuly.
Jeli qoldanýshylary vıdeony kórip kózderine jas úıirilgenin jasyrmady.
«Mekteppen emes, ultymen qoshtasyp jatqandaı», «Júrekti aýyrtatyn jaǵdaı», «Ókinishti, nege elge kelmeıdi? Sol tóńirektegi qazaq jurty tilimizdi, dinimizdi umytpaǵan. Tipti bizden artyq biledi. Ózderi sondaı mádenıetti, kishipeıil adamdar», «Kózińe eriksiz jas úıiredi», - dep pikir pildirdi jeli qoldanýshylary.
Vıdeony jelide bóliskenderdiń sany saǵat saıyn artýda. Onda birdeı kıim kıgen mektep oqýshylary hormen «Sońǵy qońyraý» ánin oryndaǵan. Sondaı-aq sport zalda qoldaryna qyzyl jalaýsha ustap sapta turǵan oqýshylardy baıqaýǵa bolady.
Vıdeony osy silteme boıynsha kóre alasyz: https://www.facebook.com/100007189782489/videos/2827061210876844/
"Adyrna" ulttyq portaly
