QR Aqparat jäne qoǧamdyq damu ministrı Aida Balaeva elımızde jaŋadan aşylǧan «Jurnalistika: analitika jäne zertteu» mamandyǧymen tanysty. M.S. Närıkbaev atyndaǧy KAZGIýU Universitetıne arnaiy barǧan ministr Facebook-tegı paraqşasynda joǧary oqu ornynan alǧan äserımen bölıstı.
«KAZGIýU — tek bılım beruge ǧana emes, studenttıŋ damuyna da köp köŋıl böletın, halyqaralyq deŋgeidegı zamanaui universitettıŋ etalony. Sportqa basa nazar audaratynyna, studentterdıŋ qyzyǧuşylyǧy boiynşa türlı qosymşa sabaqtarǧa män beretınıne riza boldym. Bylaişa aitqanda, studentter universitettegı uaqytyn öz paidasyna ötkızedı, damidy ärı qosymşa qabıletterdı meŋgerıp şyǧady»,- dep jazady Aida Balaeva.
Kezdesu barysynda ministr men universitet basşylyǧy bırlesıp atqaratyn jūmystary turaly äŋgımelestı. Jurnalistık etika boiynşa seminar ötkızu turaly, studentterdıŋ elımızdegı üzdık būqaralyq aqparat qūraldarynda ıs-täjıribeden ötuı mäselelerın talqylady. KAZGIýU Universitetınıŋ Basqarma töraǧasy Talǧat Närıkbaev äleumettık jelılerdegı paraqşasynda ministrmen kezdeskende qandai taqyryptardy qozǧaǧany turaly jazdy.
«Aida Ǧalymqyzymen bırge şeşuge bolatyn mäselelerdı aşyq talqyladyq. Mass-media salasynda bılıktı mamandardyŋ jetıspeuşılıgı, köptegen JOO-larda bılım baǧdarlamasy mazmūnynyŋ eskıruı, baspasöz betterındegı şyqqan materialdarda derekterdıŋ taldanbauynan BAQ-taǧy ädeptılık deŋgeiınıŋ tömen boluy syndy mäselelerdı aittyq», - deidı universitet basşylyǧy.
Esterıŋızge sala keteiık, jaqynda KAZGIýU universitetı osy jyldyŋ qyrküiek aiynda «Jurnalistika: analitika jäne zertteu» mamandyǧy aşylatyny turaly habarlady. Jaŋa bılım beru baǧdarlamasynyŋ maqsaty — qūqyqtyq jäne ekonomikalyq salada, äsırese sybailas jemqorlyqqa qarsy saiasat salasynda tereŋ bılımı bar analitik-jurnalist mamandar daiyndau.
M.S. Närıkbaev atyndaǧy KAZGIýU Universitetınıŋ baspasöz qyzmetı
8 (7172) 70-30-42
