Bügın jetınşı şaqyrylymdaǧy Şymkent qalasy mäslihatynyŋ kezektı altynşy sessiiasy öttı. Sessiianyŋ kün tärtıbınde qalanyŋ 2020 jylǧy biudjetınıŋ atqaryluy turaly, halyqtyŋ äleumettık osal toptaryn qoldau jäne oŋaltu şaralary, jolauşylar kölıgı jäne avtomobil joldary basqarmasynyŋ, qala tūrǧyndaryn baspanamen qamtu şaralarynyŋ esebı tyŋdaldy. Atalǧan mäselelerdıŋ bärı de tūraqty komissiialarda egjei-tegjeilı qaralǧan.
Sessiiada Şymkent qalasynyŋ äkımı Mūrat Äitenov jergılıktı atqaruşy organnyŋ jūmysyna serpın beretın bırqatar şeşımder qabyldanǧanyn, qalanyŋ ärı qarai damu saiasatyn jüzege asyruǧa yqpal etetın maŋyzdy mäselelerdı atady.
– Biudjettı naqtylau barysynda qarjy negızınen qalanyŋ äleumettık-ekonomikalyq damuyna oŋ äser etetın, tūrǧyndardy tolǧandyratyn mäselelerın şeşuge baǧyttaldy. Onyŋ ışınde «Nūr Otan» partiiasynyŋ sailaualdy baǧdarlamasyna säikes, qalanyŋ injenerlık-infraqūrylymdyq jüiesın damytuǧa basymdyq berılude. Sonymen qatar, köpqabatty tūrǧyn üi, aulalardy abattandyru, būqaralyq sportty damytu maqsatynda şaǧynaudandarda ämbebap sport alaŋdaryn ornatu josparlandy. Aita ketsek, 101 sport alaŋşasy salynady. Būl – ülken jetıstık. Būl jūmystar jekemenşık investorlar esebınen atqaryluda. Osy jūmystardyŋ nätijesınde ärbır şaǧynaudanda sport alaŋşalary bolady. Biyl «Şymkent jastar» ligasyn ötkızdık. Būl jobaǧa balalardyŋ qyzyǧuşylyǧy artyp otyr. 8 myŋdai bala osy jarysqa qatysty. Basty jetıstık – balalardyŋ qyzyǧuşylyǧyn arttyrdyq, – dedı qala äkımı.
Sonymen bırge, sessiiada QR memlekettık josparlau jüiesıne säikes, Şymkent qalasynyŋ 2021-2025 jyldarǧa arnalǧan damu baǧdarlamasy bekıtıldı.
Qala äkımı biyl jyl basynan berı qalanyŋ negızgı körsetkışterınde oŋ ösım baryn aityp, jūmystardy odan ärı küşeitu qajettıgın atap öttı.
Şymkent qalasy äkımdıgınıŋ baspasöz qyzmetı
