Maŋǧystauda bır bau şöptıŋ baǧasy 17 myŋ teŋgege, bır kelı arpanyŋ baǧasy 95 teŋgege jettı. Būl tört tülıktı käsıp etken auyldaǧy aǧaiynǧa oŋai bolmai tūr. Jūrt jūt keldı dep alaŋdaidy. Al deputtar osynyŋ bärı jüielı jūmystyŋ joqtyǧynan dep Ükımetke syn aitty. Elde şeşımın tappai tūrǧan mūnan da özge tüitkılder bar. Quaŋşylyq, büiırden qysqan qymbatşylyq, bılım beru salasyndaǧy olqylyqtarǧa qatysty deputattyq saualdar da joldandy, dep habarlaidy «Adyrna» ūlttyq portaly «Astana» arnasyna sılteme jasap.
Deputat Edıl Jaŋbyrşinnıŋ aituynşa, teŋızder men özenderdıŋ tartyluy, jauyn-şaşynnyŋ azdyǧy köp aimaqtyŋ, äsırese Atyrau, Aqtöbe, Qyzylorda, Maŋǧystau jäne Türkıstan oblystarynyŋ auyl şaruaşylyǧy salasyn aiaqtan tartyp tūr. Su tapşylyǧy men quaŋşylyq jaiylymdyq jerdıŋ küiın qaşyrdy. Jyl basynan berı Maŋǧystauda myŋ jarym myŋǧa juyq mal qyrylǧan. Qyzylordada da jaǧdai mäz emes. Mal azyǧy baǧasynyŋ eselep köterıluı de mäselenı onan saiyn şielenıstırıp barady.
«Elımızdıŋ mal şaruaşylyǧyn damytuǧa jäne onyŋ azyǧyn daiyndauǧa arnalǧan jüielı-josparly jūmystyŋ joqqa jaqyn ekenın aiqyn körsetıp otyr. HHI ǧasyrda ǧaryşty igerıp, Australiia men Kanadan asyl tūqymdy mal aldyryp, dünienıŋ bärın sifrlandyryp jatqanda, malǧa azyq tauyp bere almai jatqanymyz öte ūiat! Qazaq atymyzǧa syn emes pe?» - deidı QR parlamentı mäjılısınıŋ deputaty Edäl Jaŋbyrşin.Deputat jūt jailaǧan audandar men aimaqtarda şūǧyl türde tötenşe jaǧdai jariialanuyn jäne olarǧa tiıstı kömekter körsetudı sūrady. Sondai-aq quaŋşylyqtan qiyndyq körıp otyrǧan öŋırlerge basqa oblystardan mal jaiuǧa jäne mal azyǧyn daiyndauǧa jer telımderı uaqytşa berılsın degen ūsynys aitty. Al deputat Aibek Paiaev elımızde ösırıletın bidaidy özge memleketter şikızat retınde alyp, naryqqa şyǧaryp, paida tauyp otyrǧanyna qynjylady. Bız bar närsenı ūqsata almai otyrmyz deidı.
«Özbekstan ūn tartu salasyn damytyp, diırmendı käsıporyndar saldy.Qazaqstannan baratyn bidaidan qosymşa qūn salyǧyn alyp tastady. Bidaiymyzdan ūn şyǧaryp ony tek ışkı naryǧymen qamtyp qana qoimai, bızdıŋ ūnymyzdy satyp alatyn Auǧanstanǧa da, basqa da naryqtarǧa ūndy jıbermekşı.Sonda bızdıŋ ükımet ūiyqtap otyr ma? Qaida bızdıŋ aina şaralarymyz?» - deidı QR parlamentı mäjılısınıŋ deputaty Aibek Paiaev.Taǧy bır özektı mäsele-1 jäne 5 synyptarǧa arnalǧan aǧylşyn tılı oqulyǧynda kemşılık köp. Deputat Maqpal Täjmaǧambetovanyŋ aituynşa, Bılım jäne Ǧylym ministrlıgı tarapynan oŋ baǧa berılgen oqulyqta oiǧa qonymsyz dünieler kezdesedı. Aqylǧa syimaityn ertegıler, mentalitetımızge jat mätınder jas ūrpaqty adastyrady deidı mäjılısmen.
«Ekınşı synypqa arnalǧan oqulyqta ūlttyq dästürdıŋ qataryna pasha men maslennisany engızıptı. Mūny ärine, qazaqstandyq merekeler dep körsetse tüsınuge bolady. Qazaqtyŋ salt-dästürlerı men ädet-ǧūryptary dep jazylǧan taqyrypta şıldehana men balany qyrqynan şyǧaru siiaqty salt-dästürdıŋ janynda dıni merekeler nege jür?» - deidı QR parlamentı mäjılısınıŋ deputaty, Nur Otan fraksiiasynyŋ müşesı Maqpal Täjmaǧanbetova.Al Deputat Dariǧa Nazarbaeva jekemenşık balabaqşa qyzmetkerlerınıŋ jalaqysyn köteruge qatysty saual joldady. Būǧan deiın būl mäsele qaralǧan. Bıraq älı şeşımın tappai tūr. Jergılıktı äkımdıkter respublikalyq biudjetke qosymşa qarjy bölu jönınde ötınım berse de, qarajat älı joq.
"Adyrna" ūlttyq portaly
