17 maýsymda Ózbekstan Prezıdenti Shavkat Mırzııoev Jańa Andıjan qalasynyń qurylys alańynda irgetas qalaý rásimine qatysty. Bul týraly memleket basshysynyń baspasóz qyzmeti habarlady, dep málimdeıdi “Adyrna” ulttyq portaly.
Shavkat Mırzııoev qurylysty tarıhı oqıǵa dep atady.
«Eki-úsh jyldan beri meni Andıjandaǵy baspana máselesiniń sheshimi mazalaıdy. Munda jer az, baspanaǵa degen qajettilik jyldar óte kele ósti. Bir úıde birneshe kelinimen birge ene turatyn otbasylar kóp. Sondyqtan biz áreket etýge bel býdyq, jańa qala salýǵa kiristik. Munda 130 myńnan astam páterli kópqabatty úıler salynady, 450 myńnan astam adam turady », - dedi Memleket basshysy.
Qalanyń jalpy aýmaǵy 4000 gektardy quraıdy, onyń 2000-ynda turǵyn úı, áleýmettik nysandar, óndiristik aımaqtar jáne qyzmet kórsetý nysandary ornalasady. Prezıdenttiń tapsyrmasymen taǵy 2000 gektarǵa jasyl aımaqtar qurylady.
Jańa qala jobasy 8 kezeńde júzege asyrylady. 2021-2041 jyldar aralyǵyn qamtıdy. Bıylǵy jyly ınfraqurylymdy qalyptastyrý boıynsha jumystardyń bastapqy kezeńine qaıta qurý jáne damý qorynan 100 mıllıon dollar bólinedi. 33 km aýyz sýmen jabdyqtaý jelileri, 52 km avtomobıl joldary, 18 km elektr jelileri jáne 27 km gaz qubyry salynady.
Birinshi kezeńde 3310 páterli 170 kópqabatty úı, 1680 oryndyq mektep, 385 oryndyq balabaqsha jáne kúnine 200 kelýshige arnalǵan emhana boı kóteredi. Qurylys jumystary kezeńinde 10 myńnan astam turaqty jumys orny, qurylys aıaqtalǵannan keıin - óndiristik, saýda, áleýmettik jáne qyzmet kórsetý salalarynda 100 myńǵa jýyq turaqty jumys orny qurylady.
”Adyrna” ulttyq portaly
