Ulttyq birińǵaı testileýge óz ornyna bóten bireýdi ótkizbek bolǵan 4 oqýshynyń ústinen qylmystyq is qozǵalǵan dep habarlaıdy "Adyrna" ulttyq portaly «Eýrazııa» birinshi arnasyna silteme jasap.
Álgi tórteýdiń arasynda jaqsy úlgerimimen kózge túsken «Altyn belgi» ıeleri de bar. Olar jalǵan qujat jasap, ornyna ózge adamdy ótkizbek bolǵandary úshin ustalǵan.
Ulttyq testileý ortalyǵynyń málimetinshe, qazir atalǵan derek boıynsha sotqa deıingi tergeý bastalǵan. Jalpy bıyl elimizde 190 myń túlek memlekettik emtıhannan ótip, testileý nátıjesimen tanysqan.
Ulttyq testileý ortalyǵy basshysynyń orynbasary Naýjan Dıdarbekovanyń aıtýynsha, túlekterge synaq tasyrýǵa eki múmkindik beriledi. Degenmen talap qatal. Sebebi kameraǵa oqýshynyń jaýapty kóshirgeni jazylsa, birden test tapsyrý múmkindiginen aıyrylady.
«Óte qatty qıyn suraqtar joq. Mysaly, matematıkany salystyratyn bolsaq, kórshi eldermen salystyrsaq, eń jeńil matematıka testteri bizde dep aıtýǵa bolady, onda da 11-synyptarǵa arnalǵan. Sondyqtan qatal túrde ótkeni durys dep oılaımyn», — deıdi Bilim berý ortalyǵynyń basshysy Bógenbaı Serikbaı.
Alaıda soǵan qaramastan, jyldaǵy dástúrden jańylmaı, qıturqy áreketterge barǵan túlekterdi de kezdestirýge bolady. Olar óz halderinshe kómekshi quraldarǵa júginbek bolǵan.
«Bizde bir testilenýshi óziniń joǵary jaǵyndaǵy kameraǵa skotch jabystyrýǵa talpynǵan. Endi adamnyń fantazııasy degen ár qıly ǵoı. Sondyqtan árkim shamasy kelgenshe daıyndalǵan bolar», — deıdi N.Dıdarbekova.
Aıta ketý kerek, bıyl Ulttyq birińǵaı testileý maýsymnyń 30-yna deıin jalǵasady.
"Adyrna" ulttyq portaly.
