Şymkent qalasynda jyl basynan berı 36 969 otbasy iaǧni, 179 209 azamatqa atauly äleumettık kömek taǧaiyndaldy. Kömek aluşylardyŋ ışınde 1-6 jasqa deiıngı balalary bar otbasylarǧa ai saiyn kepıldendırılgen äleumettık toptamalar taratylady.
Būl turaly qalalyq jūmyspen qamtu jäne äleumettık qorǧau basqarmasy basşysynyŋ mındetın atqaruşy Erman Bekmūratov qala äkımdıgınıŋ «Instagram» jäne Facebook paraqşasynda ötken tıkelei efirde mälımdedı.
Atauly äleumettık kömek – tabysy tömen azamattarǧa tölenetın memlekettık qarjylai qoldau. Ötınışke qūjat tapsyrǧannan keiın arnaiy qūrylǧan komissiia ötınış tapsyruşynyŋ tūrmystyq jaǧdaiyn tekserıp şeşım qabyldaidy. AÄK aluşylardyŋ otbasylyq tabysy jan basyna şaqqandaǧy kedeilık şegı 22 535 teŋgeden tömen bolǧan jaǧdaida taǧaiyndalady. Al jūmyssyz jürgen azamattarǧa qalalyq jūmyspen qamtu ortalyǧy tarapynan «Jūmyspen qamtudyŋ» belsendı şaralaryna qatysu ūsynyluda.
Basqarma basşysy bır saǧatqa sozylǧan tıkelei efir barysynda äleumettık sala boiynşa atqarylyp jatqan jūmystar barysyn baiandap, soŋynan tūrǧyndar tarapynan qoiylǧan sūraqtarǧa egjei-tegjeilı jauap berdı. Efirge jalpy 1200-ge juyq adam qosylyp, qajettı aqparat aldy.
Erman Bekmūratovtyŋ aituynşa, basqarma tarapynan ardagerler men halyqtyŋ osal toptaryna äleumettık qoldau körsetu baǧytynda bırqatar jūmystar atqaryluda. Onyŋ ışıne zeinetkerler, ŪOS ardagerlerı, tyl eŋbekkerlerı men köp balaly analar jäne ata-anasynyŋ qamqorlyǧynsyz qalǧan, mügedektıgı bar balalar kıredı. Olardy qoldauǧa mereke men atauly künderge arnalǧan bır rettık tölem jäne ai saiynǧy 13 türlı kömek körsetılude.
Sondai-aq, biyl 2 toqsannan bastap AÄK-ke ötınışter Egov.kz portaly arqyly onlain qabyldanuda. Ötınışterın qaşyqtan tapsyrulary üşın azamattardyŋ elektrondy sifrlyq qoltaŋbalary (ESQ) boluy kerek. Halyqqa sapaly qyzmet körsetu maqsatynda jyl basynan berı «Halyqty jūmyspen qamtu ortalyǧy» 4 audanǧa bölıngen. Barlyǧynda «Özıne-özı qyzmet körsetu» aimaqtary qarastyrylǧan.
Şymkent qalasy äkımdıgınıŋ baspasöz qyzmetı
