Şymkent qalasynyŋ äkımı Mūrat Äitenovtıŋ töraǧalyǧymen ötken investisiialyq ştabtyŋ kezektı otyrysynda bırqatar mäseleler qaraldy.
«ZOOM» platformasy boiynşa ötken jiynǧa Şymkent qalasynyŋ käsıpkerler palatasy öŋırlık keŋestıŋ töraǧasy Qairat Moldaseiıtov, qalalyq käsıpkerler palatasynyŋ direktory Nūrlan Qabyştaev, «Kanfar Building» JŞS, «Bek stroi servis» JŞS, «Umit Qala» (BI Group) JŞS, «Iýg PLASTIC KZ» JŞS, «Mariam Ai» JŞS, t.b mekemelerdıŋ basşylary qatysty.
İnvestisiialyq ştab otyrysynda 2021 jyldyŋ qaŋtar-mamyr ailarynda negızgı kapitalǧa salynǧan investisiialar jäne 2021 jylǧy qaŋtar-mausym ailaryna boljam, jaŋa jobalar men jobalardyŋ özektı mäselelerı jäne hattamalyq tapsyrmalardyŋ oryndalu barysy talqylandy.
Aldymen qalalyq käsıpkerlık jäne industrialdy-innovasiialyq damu basqarmasynyŋ basşysy Bereke Düisebekov 2021 jyldyŋ bes aiyndaǧy negızgı kapitalǧa salynǧan investisiialardyŋ oryndalu barysyn baiandady.
Basqarma basşysynyŋ aituynşa, jyl basynda jospar 89,2 mlrd teŋge bolatyn. Bes aidyŋ qorytyndysyna säikes, negızgı kapitalǧa salynǧan investisiialar boiynşa 93,2 mlrd teŋge igerıldı. Ötken jyldyŋ tiıstı kezeŋımen salystyrǧanda būl körsetkış naqty 20,7 %-ǧa artyp otyr.
Atap aitqanda, jaŋǧyrtu jobalary, «Oŋtüstık» AEA, «Oŋtüstık» İA, «Tassai» İA, «Şymkent» ÄKK» AQ arqyly jüzege asyrylatyn jobalar, sauda, kölık jäne äleumettık salalarǧa baǧyttalǧan jobalar boiynşa investisiialar igerıldı.
Ştab otyrysynda «Şymkent» ÄKK» AQ Basqarma töraǧasy B.Kankin jäne investorlar jaŋa jobalaryn ūsynyp, sol jobalar boiynşa özektı mäselelerdı talqyǧa saldy.
Atap aitar bolsaq, jiynǧa qosylǧan «Iýg PLASTIC KZ» JŞS direktory Azizbek Turdiev önım türlerın ūlǧaitu, jaŋa baǧyttar qosudy josparlaǧanyn mälımdei kele qūrylys materialdaryna mamandanǧan öndırıs ornyna qosymşa jer qajettıgın jetkızdı. Däl osyndai mäselenı «Mariam Ai» JŞS kölıkterdıŋ qosalqy bölşekterın şyǧaratyn käsıporyn basşylyǧy da köterdı. Mekeme basşysy Farabi Äbuov «Jūldyz» industrialdy aimaǧynan jer berudı sūrady. Sonymen bırge, «KDL Olimp» JŞS da öz öndırısterın ūlǧaitudy josparlap otyrǧandyǧyn aitty.
Jiynda «Şymkent» ÄKK» AQ Basqarma töraǧasy Bauyrjan Kankinnıŋ barlyq ūsynystary hattamaǧa engızılıp, tapsyrma berıldı. Jeke käsıpkerlerdıŋ ötınışterı boiynşa jer beru mäselesı de şeşımın tabady. Sondai-aq, ötken ştab otyrystarynda berılgen tapsyrmalardyŋ oryndalu barysy da pysyqtaldy.
Şymkent qalasy äkımdıgınıŋ baspasöz qyzmetı
