Qazaqstan Prezıdenti Qasym-Jomart Toqaev jubaıyn óltirgeni úshin sottalǵan ekibastuzdyq Larısa Antonıýkke raqymshylyq jasady, dep habarlaıdy «Adyrna» ulttyq portaly Polisia.kz saıtyna silteme jasap.
Prezıdent Larısa Antonıýktiń raqymshylyq jasaý týraly ótinishine qol qoıdy, endi áıel merziminen buryn bosatylady.
Larısa Antonıýk 2011 jyly jubaıyn óltirgeni úshin sottalǵan. Ony Túrkimenstan soty 21 jylǵa bas bostandyǵynan aıyrǵan bolatyn. Taǵy 10 jyly qalǵan. Buǵan deıin birneshe ret jazasyn jumsartýǵa ótinish jazǵan, biraq bárinde teris jaýap alǵan.
Larısa ol jigitpen Qazaqstanda tanysqan, keıin biraz ýaqyttan soń qarym-qatynasyn zańdastyrǵan. Úılengennen keıin jastar jigittiń týǵan jerine - Túrikmenstanǵa kóship barady. Sottalýshynyń aıtýynsha, kúıeýiniń ata-anasy ony birden qabyldamaǵan. Keıin ol jubaıynyń esirtkige táýeldi ekenin bilgen. Er adam qarjylyq qıyndyqtarǵa tap bolyp, otbasy múshelerine qol kótere bastaǵan, esirtki alý úshin aqsha talap etken.
Larısa jumysta júrgende balalardyń ómiri úshin únemi qorqyp otyratynyn aıtqan. Alaıda bir kúni janjal kezinde ol ózin qorǵaımyn dep kúıeýin óltirip alady. Larısa jergilikti kolonııaǵa qamalyp, tórt balasy balalar úıine jiberiledi.
Keıin ol Qazaqstanǵa qaıtarylady, onda ol Óskemennen 200 shaqyrym jerdegi áıelder kolonııasynda jazasyn óteıdi. Larısanyń ápkesi balalardy balalar úıinen alyp ketip, qamqorlyǵyna aldy.
2020 jyldyń mamyrynda qylmystyq-atqarý júıesiniń qyzmetkerleri oǵan balalarymen vıdeoqońyraý arqyly sóılesýge múmkindik beredi, ol sol kezde 10 jylda alǵash ret balalaryn kórdi. Sottalǵan kezde balasy eki jasta edi. Oǵan qamqorlyqty úlken qyzy aldy, qazir ol kúıeýimen kishkentaılarǵa qaraıdy, bári bir shańyraq astynda turady.
«Mekeme qyzmetkerleri qajetti materıaldardy ýaqytyly jınap, jiberdi. Qazaqstan Prezıdenti Larısa Antonıýkke raqymshylyq jasady. Sottalýshynyń merzimi 21 jyldan 16 jylǵa qysqartyldy. Ol tıisti qujatpen tanysty. Raqymshylyqqa baılanysty onyń resmı merzimi 2021 jyldyń shildesiniń sońynda aıaqtalady. Larısa jazasyn óteý kezinde ózin jaqsy jaǵynan kórsetti. Tigin ehynda jumys isteıdi. Barlyq mádenı is-sharalarǵa belsendi qatysady», - dep habarlady ShQO boıynsha qylmystyq-atqarý júıesi departamentiniń basshysy Janbolat Káletaev.
"Adyrna" ulttyq portaly
