Şymkenttık ūstazdar bılıktılıgın arttyru üşın jalǧan attestasiia jasatyp, sertifikatty satyp alǧan dep habarlaidy "Adyrna" ūlttyq portaly "24.kz-ke" sılteme jasap.
Öŋırdegı 348 mūǧalım 2018-2019 jyldary jeŋıl joldy taŋdap, öz sanatyn joǧarylatqan. Memleketten tölenetın üstemaqyny da alyp otyrǧan. Özge ūstazdar ärıptesterınıŋ būl ısın qūqyq qorǧau organdaryna jetkızdı. Keiın qarjy polisiiasynyŋ mamandary testıleuden ötkenderdıŋ tızımın jasaqtap, Respublikalyq test ortalyǧyna jügıngen.
Qaladaǧy jalpy 64 mekteptıŋ köptegen qyzmetkerı testke kelmegenı belgılı boldy. Keibırı synaqtan sürıngen. Olar jalǧan mör basylǧan qūjat satyp alǧan.
Mūǧalımderdıŋ 80%-y ekı jyldyŋ ışınde alǧan üstemaqylaryn biudjetke qaitaryp ülgerıptı. Endı olar qaitadan test tapsyrady. Al sertifikatty satyp, jeŋıl joldy käsıp etkenderdıŋ ısı qazır sotta qaralyp jatyr.– Mūǧalımderdıŋ jalǧan attestasiiasyna qatysty qazırgı uaqytta qylmystyq ıs qozǧalyp, alaiaqtyq üşın sot prosesı jürıp jatyr, — deidı Şymkent qalalyq bılım basqarmasynyŋ basşysy Janat Täjieva.
"Adyrna" ūlttyq portaly.
