Şymkent qalasy jūmyspen qamtu jäne äleumettık qorǧau basqarmasynyŋ «Asyl jürek» ortalyǧynda zeinetkerlerge jaqsy jaǧdai jasalǧan. Qazırgı taŋda onda 80-ge juyq zeinetkerge tegın qyzmet körsetılude.
Külaişa Boitanova ortalyqta em aluşylardyŋ bırı. Külaişa Tölegenqyzynyŋ zeinetke şyqqanyna 7 jyl bolǧan. Ortalyqta jeltoqsan aiynan berı tegın qyzmet türlerın aluda. 62 jastaǧy zeinetker ortalyqtaǧy kün tärtıbımen bölıstı. Em aluşylar taŋerteŋ kündelıktı därıgerlık tekseruden ötedı. Onda qan qysymy, temperatura jäne salmaq ölşeu, bel şeŋberın dinamikada baqylau sekıldı jalpy jaǧdaiyn tekseredı.
– Fizioterapiia emdeu bölımınde belomyrtqa osteohondrozyna «polimag» apparatynda em aldym. Bır aptanyŋ ışınde belımnıŋ auyrǧany azaiyp, erkın qimyldai alatyn boldym. Sondyqtan osy apparattyŋ em nätijesı jaqsy ekenıne közım jettı. Ortalyqta kompiuterlık sauattylyq, «Egov» elektrondy ükımet portaly kursynda bır jolǧy jasyryn söz, elektrondyq sifrlyq qoltaŋba alu, QR kodpen kıru joldaryn üirendım. Sondai-aq, ioga jattyǧularynyŋ da maǧan köp kömegı tidı, – deidı ol.
Ortalyq Şymkent qalasy äkımdıgınıŋ qaulysymen 2019 jyly 7-şı mausymda saltanatty türde aşyldy. Mūnda kardiolog, terapevt, nevropatolog, fizio-terapevt därıger mamandary qyzmet körsetedı.
Ǧimarat medisinalyq tekseruden ötu aimaǧy, internet - kafe (egov.kz «Elektrondy ükımet» portaly), emdık-uqalau jäne kinozal, kıtaphana, trenajerlyq jäne sportpen şūǧyldanu (ioga, bi, üstel tennisı, biliard), sensorlyq kabinet, tılder kursy (qazaq tılı, aǧylşyn tılı, latyn älıpbiı), qolönermen jūmys jasau aimaqtarymen jabdyqtalǧan.
Aita keteiık, «Asyl jürek» belsendı ūzaq ömır süru ortalyǧy jartylai stasionarlyq jaǧdaida arnauly äleumettık qyzmet körsetu funksiialaryn jüzege asyru maqsatynda qūrylǧan.
Şymkent qalasy äkımdıgınıŋ baspasöz qyzmetı
