Oıyńdaǵy bir sózdi túsindirý úshin tym áriden bastaýǵa týra keledi, eki aýyz sózben qalaısha jetkizersiń. 1986 - 1993 jyldar aralyǵynda Saıótes poselkelik Keńesiniń tóraǵasy bolyp jasadym. Bul SSSR-dyń ydyraý aldyndaǵy qıyn kezeńder edi. Aqsha kóz aldymyzda qunsyzdanyp, arty gıperınflıaııaǵa ushyrady. Dúkenderde kıim-keshek bylaı tursyn, azyq-túliktiń ózi tapshy edi.
Poselkeniń ereksheligi - halqy negizinen LPDS (Samaraǵa aıdalatyn munaıdy qyzdyrý peshi), temir jolǵa qarasty mekemelerden turdy. Bulardyń árqaısysynyń óz dúkenderi bar, tizimmen solar kelgen azyq-túlikti bólip berip otyrady. Odan bólek úshinshi top bar - olar kóbine jan-jaqtaǵy sovhozdardan pensııaǵa shyǵyp, endi otyn-sýy bar poselkege kelip ornyqqan shopandar, mehanızator, muǵalim, dáriger, klýb meńgerýshisi, kitaphanashy, t.s.s., bir sózben aıtqanda tóraǵaǵa qarasty birqaýym halyq. Bularda dúken joq, eshqaıdan taýar kelmeıdi, sondyqtan joǵarydaǵy dúkeni barlardan keıde kúshpen, keıde aldap-sýlap, joǵarydaǵy bastyqtarymen ymyraǵa kelip degendeı... qamtylyp otyratyn. Bir sózben aıtqanda, biz osy jumystarmen táńerteńnen keshke sheıin aınalysýmen boldyq. Jaǵdaıy qıyn, kúneltisi tómen talaılardyń saýabyn da aldyq.
Jaraıdy, endi negizgi aıtpaq oıymyzǵa keleıik. Qazir Ońtústikten Qurmet degen balamyz Mańǵystaý úshin dep shóp shaýyp, endi ony vagonmen jetkizýdi uıymdastyryp jatyr eken. Aqtóbe oblysynan da Mańǵystaý úshin tegin shóp kelgeli jatyr deıdi. Aıtalyq, Mańǵystaý aýdanynyń ortalyǵy Shetpege 5 vagon shóp keldi delik. Muny burynǵy 7 sovhoz, 2 poselke (bireýi Shetpeniń ózi), barlyǵy 9 aýylǵa teńdeı etip kim bólip beredi? Járaıdy, bólip berdi delik. Saıótes poselkesi ózine bólingen 5 mashına shóbin tasyp aldy delik (kim tasıdy - kóliktiń bári jekege ótip ketken, burynǵydaı ATP degender joq?). Endi aýylǵa kelgen shópti bólý kerek. Bireýdiń úıir-úıir jylqysy, otar-otar qoıy, sıyr-túıesi bar, ekinshisinde onshaqty jandyq qana bar.
Taǵy da kúshtiler men pysyqtar alǵa túsip, álsizder shettep qalmaı ma? Qurmet balamyz sonsha eńbektengende sol eńbegin aqyrynda onsyz da aqshasy jetkilikti bireý paıdalanyp ketse, bar shópti optom satyp alsa ádildik qaıda qalady? Sonda ol ne úshin jumystandy? Jáı tek, osyndaı jumystardan habarym bolǵandyqtan aıtyp jatqanym, áıtpese meniń aqylym kimge kerek, pensııada jatqan bir shal...
Qýanysh EDILHANTEGI,
"Adyrna" ulttyq portaly
