Şymkent respublikalyq qala statusyna ie bolǧaly qalanyŋ äleumettık-ekonomikalyq damu qarqyny ılgerılep, oŋ özgerıster baiqaluda. Üş jyldyŋ ışınde qalaǧa 1 trln. teŋgeden astam investisiia tartylǧan. 1,7 mln. şarşy metr tūrǧyn üi paidalanuǧa berıldı.
Būl turaly Şymkent qalasy äkımınıŋ orynbasary Erǧali Bılısbekov Aqparattyq-kommunikasiialyq ortalyǧy alaŋynda qalanyŋ damu strategiiasy boiynşa atqarylyp jatqan jūmystar turaly baspasöz brifingınde mälımdedı. Osydan 3 jyl būryn önerkäsıp önım kölemı 425 mlrd.teŋgenı qūrasa, jyl soŋynda 710 mlrd.teŋge bolady dep josparlanuda. Qala biudjetı 2017 jyldan berı 3,7 ese ösıp, 131,2 mlrd.teŋgeden biyl 481,6 mlrd.teŋgege jettı. Salyq bazasy ösıp, jergılıktı biudjetke özındık tüsımder 57 mlrd. teŋgeden 150 mlrd. teŋgege artqan.
– Özderıŋızge belgılı bükıl älemde oryn alǧan pandemiia älemdık ekonomikaǧa orasan ziianyn tigızıp otyr. Būl jaǧdai bızdıŋ qalamyzdy da ainalyp ötken joq. Karantindık şekteulerge bailanysty sauda, kölık, qyzmet körsetu salalary ülken zardap şektı. Nätijesınde ıskerlık belsendılık aitarlyqtai baiaulady. Desek te, 2021 jyldyŋ qaŋtar-mamyr aiynyŋ qorytyndysymen Şymkentte önerkäsıp önım kölemı 295 mlrd.teŋge bolyp, ötken jyldyŋ säikes kezeŋınen 10,1 paiyzǧa artty, – dedı Erǧali Däuletbekūly.
Eseptı kezeŋde öŋdeu önerkäsıbındegı himiia önerkäsıbı – 2,1 esege, farmasevtikalyq önımder öndırısı – 28,1 paiyzǧa, toqyma būiymdary – 23,7 paiyzǧa, tamaq önımderın öndıru – 15,8 paiyzǧa, metallurgiia öndırısı – 15 paiyzǧa artyp otyr.
Qalada sondai-aq öndırıstı damytu maqsatynda, audany 718 ga 4 önerkäsıptık aimaq jūmys ısteidı. Atap öter bolsaq, «Oŋtüstık» jäne «Tassai» industrialdy aimaqtary men «Oŋtüstık» kölık-logistikalyq aimaǧy, «Oŋtüstık» arnaiy ekonomikalyq aimaqtarynda 11 myŋnan astam jaŋa jūmys oryndaryn qūrumen 254,2 mlrd. teŋge somasyna 174 investisiialyq joba ıske asyryluda. Onyŋ ışınde, bügıngı taŋda 137,5 mlrd.teŋge somasyna 7,5 myŋǧa juyq jūmys ornymen 112 joba ıske qosyldy. Qala ekonomikasyn aldaǧy 5 jylǧa damytu maqsatynda biyldan bastap 2021-2025 jyldarǧa damytu baǧdarlamasy jaŋa formatta äzırlenıp, ıske asyryluda.
Şymkent qalasy äkımdıgınıŋ baspasöz qyzmetı
