Balalar ortalyǵynda jarylys boldy! Oqys jaıt Qyzylordada tirkeldi. Turǵyndary tańǵy 7 shamasynda qatty dybystan shoshyp oıanǵan. Dalaǵa atyp shyqqan olar úı janyndaǵy ul-qyzdarǵa arnalǵan nysannyń otqa oranǵanyn kóripti. Bul týraly «Adyrna» ulttyq portaly «Eýrazııa» birinshi arnasyna silteme jasap habarlaıdy.
Oqys oqıǵa tańǵy 7:20 shamasynda bolǵan. Jarylystyń qatty bolǵany sonsha, onyń tolqynynan jaqyn mańaıdaǵy jer úıdiń aǵashtan salynǵan saraıy qırap, 50 sharshy metr aýmaqqa zaqym kelgen. Odan bólek, bastyrmasy qulap, shyǵar esikti jaýyp qalypty. Úıdiń ıesin kórshileri terezeden shyǵarýǵa májbúr bolypty.
«Jumys jaqtan kele jatqanmyn. Sol kezde estýim boıynsha gúrs ete qaldy dedi ǵoı úıdegiler. Men kelgende mashınalar bylaı kelip, myna jaqtan ketip jatyr eken», - deıdi oqys oqıǵa kýágeri Baýyrjan Jarylqasynov.
Órt sóndirýshiler oqıǵa ornyna habar túsisimen 2 mınýtta jettik dep otyr. Óıtkeni, órt sóndirý beketimen oıyn saýyqtyrý ortalyǵynynyń arasy 1,5 shaqyrym ǵana eken. Jedel jetken tótenshelikter ǵımarattyń 1-shi qabaty tolyqtaı otqa oranǵan kórgen. Olar tilsiz jaýdy sóndirip bitkenshe ǵımarattyń birinshi qabatyndaǵy 200 sharshy metr aýmaqtyń dymy qalmaı janyp ketken.
«Oqıǵa ornyna jumyldyrylǵan jeke quram jáne tehnıkanyń arqasynda tolyǵymen órt 08:15 mınýtta joıylyp, saldarynan kórshi ornalasqan Jeńis kóshesi 20 turǵyn úıdiń 3 terezesi jáne aýlasynda ornalasqan saraıdyń qulaǵany anyqtaldy. Qazirgi tańda órttiń shyǵý sebepteri anyqtalýda. Órtke jalpy qatystyrylǵan 10 tehnıka men 44 qyzmetker», - deıdi Qyzylorda oblystyq TJD órt sóndirý kezekshi qyzmetiniń jedel kezekshisi Álı Dúısebekov.
«Adyrna» ulttyq portaly
