"Täjıkstan Auǧanstannan keluıŋ mümkın 100 myŋǧa deiın bosqyndardy qabyldauǧa daiyndalyp jatyr. Ekı şekaralas oblystyŋ aumaǧynda qajettı qorlardy qūru üşın qoimalardyŋ qūrylysy aiaqtaluda" dep habarlaidy "İnterfaks" Täjıkstan Tötenşe jaǧdailar jäne azamattyq qorǧanys komitetı töraǧasynyŋ orynbasary İmomali İbrohimzodanyŋ mälımdemesıne sılteme jasap.
Onyŋ aituynşa, Auǧanstannan keluı mümkın bosqyndardy Kuşonion aimaǧynda jäne Horogta tūrmystyq qajettılıktermen qamtamasyz etu üşın şatyrlar, tösek-oryn, gigienalyq qūraldar, ydys-aiaq saqtaityn ekı arnaiy qoimanyŋ qūrylysy aiaqtaluda.
"Bız halyqaralyq ūiymdarmen respublikanyŋ auǧan bosqyndaryn qabyldau äleuetın anyqtau üşın kelıssözder jürgızıp jatyrmyz", - dedı İbrohimzoda.
Onyŋ aituynşa, şılde aiynda Täjıkstan öz aumaǧynda künıne 3 ret ystyq tamaqpen, medisinalyq kömekpen, ömır süruge arnalǧan şatyrlarmen, tösek jabdyqtarymen, as üi ydystarymen el ükımetı esebınen qamtamasyz etılgen 1574 bosqyndy panalatqan.
"Adyrna" ūlttyq portaly
