Keshe ǵana ótken aýyl ákimi saılaýynda birqatar zań buzýshylyqtar tirkelgeni belgili boldy. Partııalyq emes baıqaý ortalyǵynyń málimetinshe, keıbir pysyqaılar qujatsyz kelse, ózgesi daýys berý kabınasyna eki adam bolyp kirýge árekettengen. Sondaı-aq óz týysqanyna daýys berýge asyqqandar da bar. Al sarapshylar saılaýǵa oń baǵa berip otyr. Aýyl turǵyndary úshin asa mańyzdy saılaý jaıly "Adyrna" ulttyq portaly «Eýrazııa» birinshi arnasyna siltep habarlaıdy.
730 eldi mekende ótken aýyl ákimi saılaýy óz máresine jetti. Tirkeýden ótken 2 297 kandıdat baq synady. Endi aldaǵy kúnde jeńiske jetken kandıdattar belgili bolady.
Al saılaý barysynda 1 419 adam ózin-ózi usynsa, 878 kandıdat saıası partııalardan qatysqan. Halyqtyń daýysy arqyly ákim bolýdan úmitti 2 297 azamattyń 1 839-y er adam, 458-i áıel. Árbir kandıdatqa respýblıkalyq bıýdjetten úgit-nasıhat jumysyna 220 000 teńge bólingen bolatyn.
Caılaýdy partııalyq emes baıqaý ortalyǵynyń tóraǵasy Tólegen Kúnádilovtyń aıtýynsha, keshegi ótken saıası dodada Shyǵys Qazaqstan men Jambyl oblysynyń aýyl turǵyndary belsendilik tanytqan.
Jalpy Qazaqstan boıynsha 6 322 aýyl bar, onda 7 mıllıonnan asa adam turady. Jergilikti saılaý komıssııalary jasaqtaǵan derekke sáıkes, óńirdegi ákimi saılanatyn aýyl, aýyldyq okrýg, aýdandyq mańyzy bar qala men kent turǵyndarynyń 90 paıyzy óz tańdaýyn jasaǵan.
Jalpy 1845 saılaý ýchaskelerinde Partııalyq emes baıqaý ortalyǵynyń 2000-ǵa jýyq baıqaýshylary saılaýdy bas-aıaǵy baqylapty. Jalpy elimiz boıynsha 12 zańbuzýshylyq tirkelgen. Olardyń ishinde sanıtarlyq talaptardyń oryndalmaý, araqashyqtyq saqtalmaý, bıýleten toltyrý kabınkalaryna eki adamnyń kirip ketýi jáne de óz otbasy múshesine daýys berý áreketteri tirkelgen. Dese de olar saılaý proesiniń zańdylyǵy men ashyqtyǵyna áser etpedi, deıdi mamandar.
Tolyǵyraq vıdeoda:
"Adyrna" ulttyq portaly
