Búgingi tańda 83 jyldyq tarıhy bar Almaty qalasynyń Memlekettik QÝYRShAQ teatry – respýblıkamyzdaǵy eń iri óner ujymdarynyń biri. Óner oshaǵy búginde talantty artıster men qýyrshaq sheberleriniń, rejısserlerdiń, sýretshilerdiń birneshe urpaǵyn tárbıelep shyǵardy. Elimizde jáne shet elde ótken halyqaralyq, respýblıkalyq teatr festıvalderinde bıik belesterdi baǵyndyrǵan ujymnyń alǵa qoıǵan
baǵyty men baǵdary da aıqyn. Ol – qazaqtyń qýyrshaq teatry ónerin órkendetý, keshegi men búgingi ómir arasyn ónerdiń bıik shyńy arqyly shynaıy kórsete bilý.
Bolashaǵymyzdyń jarqyn, keler urpaqtyń bilimdi, salıqaly bolýy bala tárbıesine tikeleı baılanysty ekeni haq. Sol sebepti de, álemdik básekege saı, rýhanı turǵydan baı, jan-jaqty, bilimpaz urpaq tárbıeleý jolynda QÝYRShAQ teatry aıanbaı eńbek etýde. Óner ordasy 82-shi maýsymyn jappastan úzdiksiz jumys atqaryp, óz kórermenderin kúndelikti qoıylymdarymen qaýyshtyrdy. Kóptegen áleýmettik jaǵdaıy nashar, múgedek balalarǵa qaıyrymdylyq tegin kórsetilimderin uıymdastyrýdy teatr ujymy aılyq jumys josparyna turaqty túrde engizgen.
83 maýsymyn «Ana júregi» spektakliniń premerasymen ashqan óner ordasy jańa jyl merekesiniń qarsańynda kórermen nazaryna kezekti «SÝ ASTY PATShALYǴYNDAǴY JAŃA JYL» (avt.: A.Sergeev, rej.: O.Aqjarqyn-Sársenbek) ertegisiniń premerasyn usyndy. Kóńildi ári jarqyn qoıylym barysynda kishkentaı kórermender akvahanshaıym Infanta, Valýn patsha jáne onyń ýáziri Skýbamen birge sý astyna saıahat jasap, jańa jyldy qarsy alý úshin ár túrli shytarman oqıǵalardan ótti.
Merekelik baǵdarlama 20 jeltoqsan men 15 qańtar aralyǵynda ótkiziledi. Teatrǵa kelgen ár kórermendi teatr foıesinde aıaz ata, aqshaqar, teńiz qaraqshysy, totyqus, juldyz, ıt, taýyq, t.b. ertegi keıipkerleri qushaq jaıa qarsy alyp, jasyl shyrsha aınalasynda án saldyryp, bı bıletip, ár túrli oıyndar oınata otyryp, merekelik kóńil kúıge bóleýde.
Gúlim KÓPBAIQYZY
