Jambyl oblysyndaǵy jaralystan keıin joǵalyp ketken jaýyngerdiń jaqyndary búgin shý shyǵardy. Olar Baýyrjan Dáýitbaevty izdeý jumysy sylbyr júrip jatyr dep shaǵym aıtyp otyr, dep habarlaıdy “Adyrna” ulttyq portaly KTK arnasyna silteme jasap.
Al áskerıler iz-túzsiz ketken kishi serjantty tabýǵa bar kúshimizdi salyp jatyrmyz dep aqtaldy. Tipti izdeý jumystarynyń qarqyndy júrip jatqanyn dáleldeý úshin Baýyrjannyń týystaryn jarylys bolǵan aýmaqqa kirgizýge májbúr boldy.
Baýyrjan Dáýitbaevtan 14 kúnnen beri habar joq. Onyń ne óli, ne tiri ekeni belgisiz. Jarylys bolǵan aýmaq ta, aýyl-aımaq ta túgel tekserildi. Biraq ony kórdim-bildim degen tiri jan joq. Al 34 jastaǵy jaýyngerdi úıinde tórt balasy men jary kútip otyr. Ata-anasy da jarty aıdan beri janyn qoıarǵa jer tappaı otyr. Olar Baýyrjan tiri degen úmitte. Sondyqtan izdeý jumystaryn kúsheıtý kerek deıdi.
“Adam az, búkil Qazaqstannyń áskerılerin shaqyrsyn. Nege shaqyrmaıdy? Aqparat berip otyr, 100 adam dep, qaıdaǵy! Nebári 15 adam júr”, – deıdi Baýyrjannyń anasy Farıda Aǵybekova.
Qaýmalaǵan kisilerdiń bári Baýyrjannyń jaqyndary. Búgin olar atyshýly áskerı bólimniń aldyna jınaldy. "Izdeý jumystaryna kóńilimiz tolmaıdy" degender jarylys bolǵan aýmaqqa kirigizýdi talap etti. Sol jerdegi atqarylyp jatqan isti kózben kórýimiz kerek dep baıbalam saldy. Keıin áskerıler amalsyz Baýyrjannyń ákesi bastaǵan úsh adamdy ishke ótkizip, jarylǵan qoımany kórsetip qaıtty.
“Bárin tóńkerip tastady. Qaıda ketýi múmkin? Qaıta ketedi, tóńkerip jatyr. Úsh márte topyraqty bylaı alyp, qaıta bylaı qoıdy. Tormen jumys istedi”, – deıdi áskerıdiń ákesi Talǵat Dáýitbaev.
Al áskerıler Baýyrjan Dáýitbaev jaralys oshaǵynan nebári 30-40 metr jerde bolǵan deıdi. Iaǵnı oqys oqıǵa kezinde qoımada júrgen. Ony sol mańnan sońǵy ret kórgen áriptesteri aıtyp bergen. Sondyqtan da jarylys bolǵan aýmaq muqııat tekserip jatyr. Biraq izdeý ońaıǵa soǵyp jatqan joq. Sebebi jaralystan keıin onda tereńdigi 20 metrlik or paıda bolyp, aınalasy topyraqqa kómilip qalǵan eken.
“Senseńizder, biz úıilgen topyraqty qoparyp alyp, ony elekten ótkizip qarap jatyrmyz. 14 kúnen toqtaýsyz jumis istep jatyrmyz. Bizdiń mindetimiz – Baýyrjan Dáýitbaevty tabý. Sol jerde bar, ne joq ekenine kóz jetkizýimiz kerek”, – deıdi Taraz baspasóz qyzmetiniń bastyǵy Dına Mýharınova.
26 tamyzda Jambyl oblysy Baızaq aýdanyndaǵy áskerı bólimnen órt shyǵyp, artynan joıqyn jarylystar bolǵan. Oqys oqıǵadan 16 adam ajal qushyp, 26 naýqas áli kúnge aýrýhanada jatyr . Al tilsiz jaýdyń neden tutanǵany ázirge belgisiz.
